Կառավարությունը մտադիր է բնակարան նվիրել Շիրակի մարզի ավագ դատախազ Վահե Միրզոյանին: Նվիրատվության անհրաժեշտությունն, ըստ կառավարության, դատախազի բնակարանային խնդիրը լուծելն է:
Վաղը կառավարության նիստին կներկայացվի որոշման նախագիծը` Գյումրու Անի թաղամասի 13 փողոցի 11ա շենքի՝ ընդհանուր 57.48 քառ. մետր մակերեսով N 5 երկու սենյականոց բնակարանը ՀՀ օրենսդրությամբ սահմանված կարգով նվիրաբերել փաստացի տիրապետող Վահե Արշալույսի Միրզոյանին որպես բնակելի տարածք օգտագործելու պայմանով: Նվիրվող բնակարանը Շիրակի մարզպետարանինն է:
Նախագծում նշված է, որ դատախազ Վահե Միրզոյանը 2000 թվականից աշխատում է Շիրակի մարզի դատախազությունում եւ 2004-ից դատախազն իր ընտանիքի հետ բնակվել է հիմա արդեն նվիրատվություն հանդիսացող բնակարանում` որպես ծառայողական բնակարան:
«Շիրակի մարզի դատախազ Ր.Վ. Ասլանյանը միջնորդություն է ներկայացրել՝ վերոնշյալ բնակարանը ՀՀ օրենսդրությամբ սահմանված կարգով, որպես բնակելի տարածք Վ. Միրզոյանին նվիրաբերելու` նրա ընտանիքի բնակարանային խնդիրը լուծելու համար, հաշվի առնելով նաեւ 10 տարուց ավելի վերջինիս կողմից նշված բնակարանը տիրապետելու հանգամանքը»,-գրված է որոշման նախագծում:
Կարդացեք նաև
Այս միջնորդությունն ու ՀՀ քաղաքացիական օրենսգրքի 605-րդ հոդվածի պահանջները հաշվի առնելով, (այսպես է հիմնավորում կառավարությունը) նշված բնակարանը կառավարությունը նվիրաբերվում է դատախազին` որպես բնակելի տարածք օգտագործելու պայմանով:
Նելլի ԲԱԲԱՅԱՆ
