Ճարտարապետ Հրաչ Պողոսյանի համոզմամբ, «Զվարթնոց» միջազգային օդանավակայանի կլոր ուղևորային համալիրը ոչ թե քանդելու, այլ այն օգտագործելու տարբերակներ պետք է մշակել: Ճարտարապետի խոսքով այդ համալիրը իր ծավալով ու ճարտարապետական նշանակությամբ այնպիսի արժեքավոր շինություն է, որ քանդելու կողմնակիցները այդ գաղափարը պետք է մտքներից հանեն:
Պարոն Պողոսյանը Aravot.am-ի հետ զրույցում ասաց, որ համալիրի հին լինելու մասին խոսակցություններն էլ են միտումնավոր տարվում. «Նման բան չկա: Միտումնավոր են խոսում այդ մասին, որ մեզ՝ բոլորիս, բերեն այն մտքին, որ իրեն-իրեն քանդվում էր շենքը, դրա համար քանդեցինք: Նույն բանն արեցին երիտասարդական պալատի, «Սեւան» հյուրանոցի, Լենինի արձանի պատվանդանի դեպքում: Եթե իրենց պետք է քանդել, ասում են քանդվում է: Հիմա Երեւանի շենք –շինությունների 70% կարելի է այդ պատրվակով քանդել»:
Նրա խոսքով քանդելու հերթը «Ռոսիա» կինոթատրոնինն է. «Մեծ վտանգի տակ է, հաջորդը դրա հերթն է: Հանրությունը պետք է պայքարի, թողնում են ճարտարապետների վրա, բայց դրանք ժողովրդինն են, ժողովուրդը պետք է պայքարի իր հարստության համար»:
Կարդացեք նաև
Որպես Երիտասարդական պալատի ճարտարապետներից մեկը պարոն Պողոսյանը սրտնեղել է, որ տարիներ առաջ այն քանդեցին՝ խոստանալով միջազգային բարձր չափանիշներով համալիր, բայց. «Այսօր նոր համալիրի նախագիծը չկա, ոչ նախագծողը, ոչ էլ երիտասարդական պալատի տերը»:
Արփինե ՍԻՄՈՆՅԱՆ
