Հուլիսի 21-ին ՀՀ վարչապետի տիկին և «Իմ քայլը» բարեգործական հիմնադրամի գործադիր տնօրեն Աննա Հակոբյանը Եթովպիայում անցկացվող «Խաղաղություն և կայուն զարգացում. փիլիսոփայական ուսումնասիրություն» խորագրով միջազգային համաժողովի երկրորդ օրը մասնակցում էր «ինքնության, ապագաղութացման և կայուն զարգացման» թեմաներով քննարկումներին:
Համաժողովը կազմակերպվել էր «Արժեքների և փիլիսոփայության հետազոտությունների խորհուրդի» կողմից և անցկացվում է Ադիս Աբեբայի համալսարանի սոցիալական գիտությունների, արվեստի և հումանիտար գիտությունների քոլեջում:
Համաժողովի երկրորդ օրը ելույթներով հանդես եկան Հարավային Աֆրիկայի համալսարանի, Ադիս Աբեբայի համալսարանի պրոֆեսորները, ինչպես նաև Արժեքների և փիլիսոփայության հետազոտությունների խորհուրդի փոխնախագահը, ՄակԼինի մշակույթի և արժեքների ուսումնասիրման կենտրոնի գործադիր տնօրենը և ուրիշներ:
Կարդացեք նաև
Նրանք անդրադարձան Եթովպիայի ինքնության ձևավորման, կրթության, ապագաղութացման, սոցիալական արդարության և կայուն խաղաղության հաստատման հիմնախնդիրներին։ Քննարկումների շրջանակում ներկայացվեց նաև կոնֆուցիոսականության տեսանկյունից կայուն զարգացման հարցը։
Համաժողովն ամփոփվեց եզրափակիչ նիստով, որի ընթացքում ելույթ ունեցան Արժեքների և փիլիսոփայության հետազոտությունների խորհուրդի փոխնախագահը Ժուաո Վիլա-Շան և Ադիս Աբեբայի համալսարանի պրոֆեսոր Ուորքինե Քելբեսան՝ ամփոփելով համաժողովի հիմնական արդյունքները և ևս մեկ անգամ ընդգծելով միջազգային ակադեմիական համագործակցության կարևորությունը։
Համաժողովի շրջանակում Աննա Հակոբյանը նաև հնարավորություն ունեցավ ծանոթանալու Եթովպիայի մշակույթին, ավանդույթներին, ազգային խոհանոցին և տեղական կոլորիտին, ինչպես նաև անմիջական շփում ունենալու հյուրընկալող կողմի ներկայացուցիչների հետ։
«Ինձ համար մեծ պատիվ էր մասնակցել այս միջազգային համաժողովին։ Երկու հագեցած և արդյունավետ օրերի ընթացքում հնարավորություն ունեցա ձեռք բերելու նոր գիտելիքներ, բացահայտելու նոր մոտեցումներ, ոգեշնչվելու ձեզնից և վերադառնալու բազմաթիվ նոր գաղափարներով ու մտահղացումներով,» – նշել է տիկին Հակոբյանը:
«Իմ քայլը» բարեգործական հիմնադրամ
