2000-ից ավելի նաիրիտցիների աշխատավարձի պարտքը փակվել է: Այն կազմել է մոտ 12 միլիոն ԱՄՆ դոլարին համապատասխան դրամ, նաիրիտցիներին վճարել են միայն մաքուր աշխատավարձը՝ 18-24 ամսվա:
«Նոյյան տապան» մամուլի սրահում «Նաիրիտ» գործարանի արհմիության նախագահ Հրաչ Թադևոսյանը նշեց, որ իրենց խնդրի լուծումը տևեց 7-8 ամիս, սակայն կառավարությունը քաջություն ունեցավ լուծել այդ խնդիրը:
«Նաիրիտի» նախկին մամուլի քարտուղար Անուշ Հարությունյանը նշեց, որ իրենց բողոքի ակցիաները չեն դադարելու և բարձրացնելու են «Նաիրիտի» վերագործարկման հարցը. «Նաիրարտցիներն այսօր աշխատավարձ ստացան, ակնհայտ է, որ մարդկանց աշխատավարձը միայն պարտքերը փակելուն կհերիքի և մեծ խնդիրներ ունեն: Հարց է, թե վաղը այդ մասնագետները որտե՞ղ պիտի աշխատեն: Քիմիական գործարանի մասնագետն այլ տեղ աշխատել չի կարող»:
Կարդացեք նաև
Դառնալով համաշխարհային բանկի աուդիտին՝ տիկին Հարությունյանն ասաց, որ եթե կառավարությունը հիմք ընդունի Համաշխարհային բանկի աուդիտը, որ «Նաիրիտը» պետք է փակվի, իրենց բողոքը ավելի բուռն բնույթ կկրի: Նա նաև զուգահեռ անցկացրեց, թե այդ ինչպե՞ս է գումար գտնվում, որ UCՕM-ը գնի «Օրանժը», բայց «Նաիրիտի» վերագործարկման համար գումարներ չկան:
Տաթև ՀԱՐՈՒԹՅՈՒՆՅԱՆ
