Սեպտեմբերի 13-ին Իջեւանում քաղաքապետի ընտրություններ են։ Հայտնի է, որ գործող քաղաքապետ Վարդան Ղալումյանը, որը նախորդ ընտրություններում քաղաքապետ դարձավ բացառապես ԲՀԿ-ի աջակցությամբ՝ դուրս է եկել կուսակցությունից եւ անդամակցել ՀՀԿ-ին։ Իջեւանում ԲՀԿ-ն ի՞նչ դիրքորոշում է որդեգրելու՝ Aravot.am-ի հարցին, ԲՀԿ մամուլի խոսնակ Վահան Բաբայանը պատասխանեց. «Կարծում եմ՝ պատասխանը պարզ պիտի լինի բոլորի համար։ Բնականաբար, ԲՀԿ-ն չի սատարելու Վարդան Ղալումյանին եւ դա միանգամայն հասկանալի է։ Ավելին, ԲՀԿ Իջեւանի մեր կառույցին հստակ հանձնարարական է տրված՝ ընտրական հանձնաժողովներում ապահովել արդար եւ ազատ ընտրություն։
Ինչպես նշեցի՝ կուսակցությունը Վարդան Ղալումյանին սատարելու որոշում չունի, եւ ԲՀԿ այն անդամը, որն ինչ-որ կերպ կաջակցի Վարդան Ղալումյանին՝ անմիջապես կհեռացվի կուսակցության շարքերից։ Սա, վստահաբար, արդար որոշում է, եւ մենք մեր րոպե անգամ չենք կասկածում, որ Իջեւանի կառույցի ԲՀԿ անդամները արժանապատիվ կուսակցականներ են, եւ ամեն ինչ հրաշալի հասկանում են»։
Նելլի ԳՐԻԳՈՐՅԱՆ
Հարգելի պարոն Վահան Բաբայան, տեղեկացնում եմ Ձեզ,որ Իջևանի ԲՀԿ-ի գրասենյակը իր ամբողջ ներուժով սատարում է Վարդան Ղալումյան թեկնածուին: Եթե ԲՀԿ-ն նման որոշում ունի ուրեմն, Երևանից մարդ ուղարկեք, որպեսզի Ձեր Իջևանի ԲՀԿ-ի գրասենյակի դուռը փակի, քանի որ բոլորն էլ պետք է հեռացվեն կուսակցությունից,կուսակցության որոշմանը հակառակ գնալու համար: Խոսելիս գոնե հասկանալով խոսեք?