Լրահոս
Օրվա լրահոսը

«Կրճատումների տեղ շատ կա. լավ է ուշ, քան երբեք». Էդմոն Մարուքյանը՝ Հովիկ Աբրահամյանին

Մայիս 12,2016 16:19

2016-ի բյուջեն քննարկելիս պատգամավոր Էդմոն Մարուքյանը կառավարության աշխատակազմի ղեկավար-նախարար Դավիթ Հարությունյանին դժգոհեց, որ այս սուղ պայմաններում կառավարության պատերը ոսկեզօծելու համար միայն 15,8 մլն դրամ են ծախսել:

Հիշեցնենք, որ կառավարության շենքի ներքին հարդարման համար ճոխ-ճոխ ծախսեր էին արել՝ 241 մլն դրամի, որը մեզ աղմուկ էր բարձրացրել սոցցանցերում: Այն ժամանակ, երբ էլի պատերազմական երկիր ունեինք, էլի աղքատ բնակչություն, արտագաղթ, սուղ բյուջե, Հովիկ Աբրահամյանի կառավարության սրահի միայն հաճարե փայտի դռների համար ծախսեցին բյուջեից 2.5 մլն դրամ, իսկ դռների շրջանակները գնել էին ավելի քան 1.5 մլն դրամ: Կառավարության նիստերի դահլիճի 1 սեղանն արժեցել էր բյուջեի վրա մոտ 7 մլն դրամ:

Այսօր վարչապետ Հովիկ Աբրահամյանը զգուշացրեց, որ պետք է կրճատել ոչ միայն վերանորոգման ծախսերը, այլեւ՝ գործուղումների, ծառայողական մեքենաների, ներկայացուցչական ծախսերը, նախարարություններում պետք է կրճատվի աշխատակազմը, օպտիմալացում լինի եւ այլն:

MP Edmon Marukyan spoke about the anti-corruption package of draft laws put into circulation on February 2 in Analitik press club

Aravot.am-ի հետ զրույցում պատգամավոր Էդմոն Մարուքյանը ողջունեց վարչապետի որոշումը: Նրա խոսքերով՝ կրճատումների տեղ շատ կա. «Նախարարությունների քանակից սկսած՝ մինչեւ տարածքային կառավարման մարմիններ՝ մարզպետարաններ, կառավարությանն առընթեր մարմիններ ուռճացված են: Բազմաթիվ հաստիքներ կան, որ կարելի է կրճատել: Փոխմարզպետների հարցն եմ ես բազմիցս բարձրացրել, որ կոալիցիոն հիմունքներով փոխմարզպետի ինստիտուտը հիմնվեց, հետո կոալիցիա չեղավ, բայց մինչեւ հիմա փոխմարզպետները կան: Այս խնդիրները ես գոնե հետեւողական կերպով 4 տարի բարձրացրել եմ: Հիմա եթե ականջալուր լինեն եւ կրճատում անեն, փոքր, բայց արդյունավետ գործող կառավարություն ստեղծեն, դա կարելի է ողջունել: Լավ է ուշ, քան երբեք: Կանեն, թե ոչ՝ ժամանակը ցույց կտա»:

Երբ այս հարցերը նախկինում բարձրացվում էր՝ կառավարությունը պնդում էր, որ տեղ չունեն կրճատելու, որ ամենաանհրաժեշտ քայլերն են անում, որ ներկայացուցչական ծախսերը շատ անհրաժեշտ են, հյուր ես ընդունում, պետք է պատշաճ ընդունես, հիմա ինչպե՞ս պարզվեց, որ ներկայացուցչական եւ այլ ծախսերում կրճատման տեղ կա՝ Էդմոն Մարուքյանը պատասխանեց. «Ամեն ինչ ասվել է, որ դե ասում եք, բայց դա էլ է անհրաժեշտ: Հիմա ասում են՝ այնպիսի իրավիճակ է, որ պետք է նման քայլեր անենք: Ես կարծում եմ, նման քայլեր անելու անհրաժեշտությունը միշտ է եղել: Մենք չպիտի սպասեինք պատերազմ լիներ, նոր ասեինք՝ այլ ելք չունենք: Բայց լավ է ուշ, քան երբեք: Եթե հիմա էլ արագ փոփոխություններ արվեն, կարող ենք ոտքի կանգնել»:

Այն, որ Հովիկ Աբրահամյանը հրապարակավ հանձնարարում ու ժամանակ է տալիս Արծվիկ Մինասյանին, օրինակ, մենաշնորհների հարցն ուսումնասիրելու, Էդմոն Մարուքյանը գտնում է, որ ուսումնասիրության կարիք չկա, թող բացեն մամուլի հրապարակումներն ուսումնասիրեն՝ լրիվ բավարար է՝ պաշտոնյաների ունեցվածքի եւ բիզնեսների մասին պատկերացում կազմելու համար:

 

Հռիփսիմե ՋԵԲԵՋՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Մայիս 2016
Երկ Երե Չոր Հնգ Ուրբ Շաբ Կիր
« Ապր   Հուն »
 1
2345678
9101112131415
16171819202122
23242526272829
3031