Նոր Քրեական օրենսգրքի 197 –րդ հոդվածն, ըստ «Հանուն ինքնիշխանության վերականգնման» նախաձեռնության հիմնադիր անդամ Հայկ Այվազյանի, վտանգավոր է մեր հասարակության համար: Այսօր «Հենարան» ակումբում ասուլիսի ժամանակ Այվազյանն ասաց, որ այդ հոդվածով, որը վերաբերում է խտրականության դրսեւորումներին, մարդիկ պատասխանատվության են ենթարկվելու, իր խոսքերով ասած՝ սեռական փոքրամասնությունների նկատմամբ խտրականության համար:
Ըստ Այվազյանի, այս նոր օրենսգրքով ԼԳԲՏ համայնքին վերաբերող միջոցառումները՝ նույնասեռական ամուսնությունները, նրանց կողմից երեխաների որդեգրումը, գեյ-շքերթները խոչընդոտելու դեպքերը, եթե քաղաքացիները փորձեն խոչընդոտել, դա կդիտարկվի խտրականություն եւ կենթարկվեն քրեական պատասխանատվության։
Այվազյանն ու ասուլիսին ներկա «Համահայկական ծնողական կոմիտե»-ի հիմնադիր անդամ Լիա Ավետիսյանն էլ ասացին, որ իրենք պայքարելու են, որպեսզի այս օրենքը չընդունվի: Բանախոսները վստահ են՝ ամբողջ ազգն իրենց կողքին է:
Նրանց ներկայացմամբ՝ այն հ/կ-ները, որոնք առաջ են տանում այս օրենքի նախագիծն ու ընտանեկան բռնության կանխարգելման մասին օրինագիծը, նաեւ փորձել էին դպրոցներում սեռական դաստիրակության պիլոտային ծրագիր ներդնել:
Մանրամասն՝ տեսանյութում
Aravot.am-ի այն հարցին՝ թե ինչո՞ւ են դեմ ԼԳԲՏ համայնքի անձանց, չէ՞ որ նրանք էլ Սահմանադրությամբ ամրագրված իրավունքներ ունեն, բանախոսները պատասխանեցին, որ իրենք դեմ են, որպեսզի ԼԳԲՏ համայնքի անձանց իրավունքները ամրապնդվեն:
Մանրամասն՝ տեսանյութում
Լիա Ավետիսյանն էլ կարծիք հայտնեց, որ մեր պետությունը գոյատեւում է ավանդական ընտանիքների շնորհիվ:
Մեր այն հարցին էլ՝ ԼԳԲՏ համայնքի ներկայացուցիչների մասին բացասական եք մշտապես արտահայտվում, սակայն երբեք նման վերաբերմունք չեք ցուցաբերում ասենք՝ կոռումպացված պաշտոնյաների նկատմամբ, կամ պետական գումարները գրպանող պաշտոնյանների նկատմամբ, չէ՞ որ նրանք էլ յուրովի են վնասում հասարակությանն ու պետությանը, տիկին Ավետիսյանը մի փոքր «հեռվից գալով» պատասխանեց, ու հայկական ընտանիքի մոդելը ներկայացրեց:
«Մենք այն ազգն եք, որ առանց փողի էլ կարող ենք երջանիկ ապրել, եթե ընտանիքն է երջանիկ: Եթե մարդը տերն ա, կինը տան մեջ հնազանդ է, եթե երեխաները սիրում են ծնողներին, ծնողներն էլ սիրում են երեխաներին՝ թող սառնարանը դատարկ լինի, թող մի կտոր հաց լինի, ինչպես 90-ական թվականներին»:
Մանրամասն՝ տեսանյութում
Նելլի ԲԱԲԱՅԱՆ
