Սա մեջբերում է «21-րդ դար» ժողովրդավարական-ազգային կուսակցության նախագահ Դավիթ Շահնազարյանի վերջին ասուլիսից, որը նաեւ ասել էր, թե «այս «նոր» կոչված իշխանությունն արդեն 1995-ից էր իշխանություն»։ «Առավոտը» հավելյալ նրան խնդրեց հայտնել, թե ինչպես է վերաբերվում նախորդ իշխանությունների վարած քաղաքական ուղեգծին գնահատական տալու նախաձեռնությանը, որը պիտի իրագործվի մինչեւ նոյեմբերի 15-ը։
«Քաղաքական գնահատականներից չխուսափելը միշտ ճիշտ է։ Ինքս տարիներ առաջ երբեք դրանից չեմ խուսափել։ Դրանք պետք է լինեն օբյեկտիվ, բայց մի բան զարմանալի է. անցել է 7-8 ամիս, ինչ այս իշխանությունը եկել է (թեեւ, ըստ էության, 95 թվականից նրանք կային, պարզապես իրենց ազդեցությունն ընդլայնեցին եւ վերջնականապես ամբողջ իշխանությանը տիրեցին 1998-ին) եւ միայն հիմա են անդրադառնում այդ գնահատականը տալու անհրաժեշտությանը, երբ արդեն ակնհայտ դարձավ այս իշխանության բացարձակ անճարակությունը, միայն փակուղի տանելու ընդունակությունը։ Կարծես 18-20-ական թվականներն են կրկնվում։ Թող տան քաղաքական գնահատական։ Ճիշտ կլինի, որ իրենք էլ տան։ Բայց այդ գնահատականն այնպես չլինի, որ հետո, որոշ ժամանակ անց, նորից փոխվի։ Այսօր 98 թ. ընտրություններն իդեալական են համարում այն մարդիկ, որոնք, ի դեպ, այդպիսին էին համարում նաեւ 95-ի եւ 96-ի ընտրությունները։ Հիմա նրանք 95-96 թթ. ընտրություններին արդեն տալիս են ռեալ գնահատական։ Այստեղ պետք է նաեւ քաղաքական ուժերի, քաղաքական գործիչների սկզբունքայնությունն ու հետեւողականությունը. մինչդեռ ակնհայտ է, որ նրանց գնահատականները տարեցտարի փոխվում են»։
Ա. Ի.
