ՀՀ կառավարության ներկայացուցիչները վերջին օրերին տարբեր առիթներով նշեցին, թե օգոստոսի վերջին կառավարության նախաձեռնությամբ հրավիրվելու է Ազգային ժողովի արտահերթ նիստ, որի օրակարգում լինելու են ՀՀ ընտրական օրենսգրքում եւ տեղական ինքնակառավարման օրենքում փոփոխություններ կատարելու առաջարկները: Սպասվում էր նաեւ, որ կառավարությունը ԱԺ կներկայացնի պետական բյուջեի ծախսային մասում փոփոխություններ կատարելու հարցը: Հուլիսի 29-ին կառավարության՝ ԱԺ հետ կապերի վարչությունում ասացին, որ խորհրդարան ուղարկվելիք օրենսդրական փոփոխությունների փաթեթը վերջնականորեն պարզ կլինի մեկ շաբաթից: Այսինքն՝ նշված օրենքներում փոփոխություններ կատարելու առաջարկները դեռեւս պաշտոնապես ԱԺ ուղարկված չեն:
Իսկ բյուջեում փոփոխություններ մտցնելու հարցի մասին ԱԺ տնտեսագիտական վերլուծության վարչության պետ Վարդան Բոստանջյանն ասաց, որ կառավարությունը որոշել է այդ հարցը լուծել առանց խորհրդարանի միջամտության՝ բյուջեի ներսում ծախսերի վերադասավորություն կատարելով, մասնավորապես, ինչպես ասվել է, կկրճատվեն պետական կապիտալ ներդրումների եւ շինարարության ոլորտների ծախսերը:
Պրն Բոստանջյանը նշեց նաեւ, որ հարկային դաշտում սպասվող փոփոխությունների համար (բենզինի եւ սիգարետի ակցիզի բարձրացման) կառավարությունը պետք է նախագիծը ներկայացնի խորհրդարանի քննարկմանը, սակայն դրա ժամկետները նույնպես հայտնի չեն:
ԱՐՄԵՆՊՐԵՍ
