Այգեգործական ընկերությունների որոշ պատասխանատուներ ըստ «Առավոտին» հասած տեղեկության՝ կանչվել էին արդարադատության նախարարություն։ Պահանջվել էին նրանց հաշվետվությունները։ Ոմանք անկեղծ «հրճվանք» էին ապրել այն գիտակցությունից, թե վերջ, իրենք դատավոր-փաստաբանների, ԶԱԳՍ-երի վարիչների նման անցնելու էին ԱՆ թեստային 100 միավորանոց սրի տակով։ Եվ նման բաներ։ Երեկ մենք կապվեցինք ԱՆ Կուսակցությունների, լրատվամիջոցների, հասարակական եւ այլ կազմակերպությունների գրանցման վարչության պետ Էդ. Մարգարյանի հետ ճշտելու համար, թե ԱՆ-ն որքանո՞վ է առնչվում այգեգործական ընկերությունների հետ։ Նա նախ տեղեկացրեց, որ գոյություն ունի 1999 թ. մարտի 19-ի կառավարության 169 որոշման կից «ՀՀ քաղաքացիական օրենսգրքի 5-րդ գլխով չնախատեսված ձեռնարկությունների, հիմնարկների, կազմակերպությունների եւ այլ իրավաբանական անձանց վերակազմակերպման» կարգ, որի 14-րդ հոդվածը սահմանել է. «Այգեգործական ընկերությունները կարող են իրենց բարձրագույն մարմինների որոշմամբ վերակազմակերպվել սպառողական կամ արտադրական կոոպերատիվի կամ ցանկացած ձեւի ընկերության»։ Եթե սպառողական է, ապա այն անցնելու է ԱՆ սրի տակով, մնացած դեպքերում… պետռեգիստրում։
ԲՈՅԿՈՏԻ ՄԵԹՈԴՈԼՈԳԻԱ
ԱԺ նոր կանոնակարգը, որ քննարկվում է պետաիրավական հանձնաժողովում, հավանաբար, պատգամավորներին այս կամ այն խնդրի քննարկումը բոյկոտելու հնարավորություն կընձեռի։ Բայց սահմանվելու է, որ բոյկոտն անպայմանորեն պատգամավորի գրանցում է նախատեսում, որովհետեւ հակառակ դեպքում՝ մարդիկ առավոտից կարող են հայտարարել, թե այսօր քննարկվելիք բոլոր հարցերը բոյկոտում են ու գնալ իրենց գործին։
Կարդացեք նաև
ԲՅՈՒՋԵՆ՝ ԴԵԿՏԵՄԲԵՐԻ ԿԵՍԻՆ
Ըստ հավաստի աղբյուրների վկայության, գալիք տարվա բյուջեի նախագիծը միայն դեկտեմբերի 9-10-ին կդառնա կառավարության վերջնական քննարկման առարկա։ Եվ միայն դրանից հետո «Պետբյուջեի մասին» օրենքի նախագիծը կուղարկվի խորհրդարանի հաստատմանը։ Դա, ըստ երեւույթին, տեղի կունենա դեկտեմբերի երկրորդ տասնօրյակի սկզբին։
ԾՐԱԳԻՐԸ ԿՔՆՆԱՐԿՎԻ ՀԵՏԱԳԱՅՈՒՄ
ԱԺ պատգամավորական հանձնաժողովի նախագահ Վիկտոր Դալլաքյանն «Առավոտին» տեղեկացրեց, որ իրենց հանձնաժողովում քննարկվող ԱԺ նոր կանոնակարգը նախատեսելու է, որպեսզի կառավարության կողմից ԱԺ ներկայացվելիք ցանկացած ծրագիր քննարկման արժանանա։ – Դա հնարավորություն կտա, որպեսզի վարչապետը ներկայացված առաջարկությունների արդյունքում փոփոխություններ կատարի ծրագրում,- ասաց Վիկտոր Դալլաքյանը։ Սեփ. լր.
