ԱԺ փոխնախագահ Տիգրան Թորոսյանը պատգամավորներին խնդրեց, որ 2000 թվականի պետբյուջեի վերաբերյալ իրենց առաջարկները ներկայացնեն դիսկետի վրա՝ ավելի արագ աշխատելու համար։ Խորհրդարանն այդչափ հարուստ չէ համակարգիչներով՝ եղածներն էլ գերազանցապես «շարիկ գլորելու» համար են օգտագործվում։ Այնուամենայնիվ, Լեւոն Բարխուդարյանը 60 համակարգիչ է խոստացել տրամադրել ԱԺ-ին։ Յուրաքանչյուր 2 պատգամավորի այսուհետ մի համակարգիչ բաժին կհասնի, որով նրանք փոխնիփոխ… էլի «շարիկ կգլորեն»։
ՎԱՏ ԼՈՒՐ
Գրեթե որեւէ արձագանք չունեցավ այն տեղեկությունը, թե ԱՄՆ պետքարտուղարության պարզաբանմամբ, Հայաստանը հետաքրքրություն հանդես չէր բերել մասնակցելու Հոլոքոսթին վերաբերող միջազգային խորհրդաժողովին։ Շահագրգռության նման բացակայությունն առնվազն տարօրինակ է այն պայմաններում, երբ Ցեղասպանությանն առնչվող խնդիրների արծարծումը միջազգային ատյաններում գրեթե պետական քաղաքականություն էր հռչակվում եւ որակական առաջընթաց դիտվում։