Արաբկիր, Քանաքեռ-Զեյթուն համայնքների առաջին ատյանի դատարանում ընթացող «Մեկ» կահույքի սրահի տնօրեն Արայիկ Մխիթարյանի սպանության գործի դատաքննությանն, անվտանգության առումով, անդրադարձել ենք բազմաթիվ անգամ։ Դահլիճը չի վերահսկվում ամբողջությամբ։ Վանդակաշարի ետեւում նախագահողին տեսանելի չէ, թե ով ինչով է զբաղված, ով ում ինչ է փոխանցում։ Չնայած՝ ուղեկցողները մանրազննին են ստուգում ներսուդուրս անողներին։ Երեկ ամբաստանյալ Լեւիկ Ավետիսյանը փորձ արեց, օրինակ, ուղեկցողներից մեկից խլել նրա ավտոմատը։ Վանդակաշարը մի պահ բաց էր, եւ կողպեքը հայտնվեց նրանց ձեռքում։ Բնականաբար, քաշքշուկ տեղի ունեցավ։ Եվ սրա հետեւանքով պատռվեց իր տեղից դահլիճ իջած դատավոր Վ. Աբրահամյանի արտահագուստը, դահլիճից հեռանալու պահին կոտրվեցին տուժողների ներկայացուցիչների ակնոցներն ու ձայնագրիչը։ Դատաքննությունն ընդհատվեց անորոշ ժամանակով։
ԲԱՑ ՆԱՄԱԿ ՀՀ-ՈՒՄ ԱՄՆ ԴԵՍՊԱՆԻՆ
«Սոցիալիստական ուժերի» եւ Մտավորականների միությունները բաց նամակ են հղել Հայաստանում ԱՄՆ դեսպանին, որով հիշեցվում է, որ յուրաքանչյուր տարվա օգոստոսի 6-ը եւ 9-ը մարդկությունը նշում է դարի ամենադաժան եւ ցինիկ գործողություններից մեկի՝ ճապոնական Հիրոսիմա եւ Նագասակի քաղաքների ատոմային ռմբակոծության զոհերի հիշատակի օրեր։ Բաց նամակում ասված է նաեւ, որ ԱՄՆ կառավարությունը թեեւ մշտապես հայտարարում է հումանիզմի եւ ժողովրդավարության իդեալներին հավատարիմ լինելու եւ ամբողջ աշխարհում խաղաղություն հաստատելու ձգտման, պետությունների ու մարդկանց միջեւ իրավահավասար հարաբերություններ հաստատելու մասին, բայց դա ընդամենը փարիսեցիություն է, քանի դեռ այն աշխարհին չի խոստովանել, որ իր կատարածը բարբարոսություն էր։ «Քանի դեռ ապաշխարում չկա, ամերիկյան ձեւով «խաղաղության եւ ժողովրդավարության» հաստատումը կուղեկցվի խաղաղ քաղաքների ռմբակոծությամբ՝ Վիետնամում կամ Սերբիայում, դիկտատորական վարչակարգերի եւ ահաբեկչական գործողությունների աջակցությամբ, անհաճո կառավարությունների դեմ գաղտնի գործողություններով եւ քաղաքական գործիչների սպանությամբ»,- ասված է ՀՀ-ում ԱՄՆ դեսպանին ուղղված բաց նամակում։
Կարդացեք նաև
ՏՆՕՐԵՆԻՆ ՍՊԱՍԵԼԻՍ
Կառավարությունը, վերջապես, հաստատեց «Արմենպրես» ՊԲԸ-ի հիմնադիր լիազոր ներկայացուցիչների կազմը։ Կազմում ընդգրկված են հետեւյալ պաշտոնները. նախագահի մամուլի քարտուղար, ԱԺ աշխատակազմի տեղեկատվության եւ հասարակայնության հետ կապերի եւ ՀՀ կառավարությանն առընթեր տեղեկատվության եւ գրահրատարակչության վարչությունների պետերը։ Հավանաբար, «Արմենպրեսի» մեկօրյա գործադուլն էր պատճառը, որ վերեւներում սկսեցին մտածել։ Մնում է «Արմենպրեսին» ունեցած պարտքերը վճարել եւ տնօրեն նշանակել։
ՍՅՈՒՆԻՔԸ՝ ԱՌԱՆՑ ՄԱՐԶՊԵՏԻ
Սյունիքի մարզպետ Ռոման Նավասարդյանն իր դիմումի համաձայն ազատվեց մարզպետի պաշտոնից։ Վարչապետը շնորհակալություն հայտնեց կատարած աշխատանքի համար։
Սեփ. լր.
