Հեռուստատեսությունների (հատկապես Ազգայինի) տղամարդ հաղորդավարները ամառվա շոգին ստիպված են էկրանին երեւալ կոստյումով։ Սակայն սաստիկ շոգը նրանց ստիպում է մի ռացիոնալ ձեւ մտածել. հագնում են կոստյումը, կապում փողկապը, եւ քանի որ գոտկատեղից ներքեւ նույնիսկ ամենաուշադիր հեռուստադիտողի աչքը չի կարող թափանցել, հագնում են, լավագույն դեպքում, կարճ շալվար, վատագույն դեպքում՝ լողավարտիք։ Դեռ լավ է, որ տեքստը կարդալ-վերջացնելուց հետո անմիջապես ոտքի չեն կանգնում։
ԿԵՂԾՎԱԾ ՍՏՈՐԱԳՐՈՒԹՅՈՒՆՆԵՐ
Էջմիածին քաղաքի ավագանու ընդունած որոշումների արձանագրություններում եղած ավագանու անդամների ստորագրությունները կեղծված են՝ այս մասին «Առավոտին» հայտնեցին նույն ավագանու անդամներ Ա. Բեգլարյանը եւ Թ. Գեւորգյանը։ Նրանք տեղեկացրին նաեւ, որ մասնակցել են ավագանու բոլոր նիստերին, հետո հայտնաբերել, որ իրենց իսկ քննարկած եւ ընդունած որոշումները կատարվում են բազմաթիվ թերություններով։ Ուստի եւ դիմել են մարզպետարան, որտեղ իրենց տրամադրել են ավագանու որոշումների արձանագրությունները, որից էլ պարզել են իրենց ստորագրությունների կեղծված լինելը։
Կարդացեք նաև
ԴԱՐՁՅԱԼ ՏԵՐ-ՍԱՀԱԿՅԱՆԻ ԳՈՐԾՈՎ
Երեկվա «Առավոտում» մենք տեղեկացրել էինք, որ ՀՀ քրեական եւ զինվորական գործերով վերաքննիչ դատարան են դիմել Արմեն Տեր-Սահակյանը, Իսրայել Սարգսյանը, Աղասի Ավետիսյանը, Մարզպետ Գրիգորյանը, Ալիկ Գրիգորյանը, Ավագ Դավթյանը։ Պարզվեց, որ վերաքննիչ բողոքով դատարան է դիմել նաեւ դատապարտյալ Սուրեն Հարությունյանը։ Վերջինս կալանքի տակ է 1994 թ. օգոստոսի 3-ից։
