«Առավոտի» հարցին ի պատասխան, թե իրականությանը համապատասխանո՞ւմ է այն լուրը, որ մինչ ՀԺԿ նախագահ Ստեփան Դեմիրճյանը կմեկներ Գերմանիա, իսկ ՀՀ նախագահ Ռոբերտ Քոչարյանը՝ ԱՄՆ, նրանք հանդիպել են, ՀԺԿ լրատվության պատասխանատուն հաստատեց, որ, այո՛, այդ հանդիպումը կայացել է սեպտեմբերի 2-ին։ Հանդիպման մանրամասները հայտնի չդարձան, միայն ընդհանուր ասվեց, որ քննարկվել է քաղաքական ու տնտեսական իրավիճակը։
ԴԵ ՀԻՄԱ ՓՈՐՁԵՔ ՀԻՇԱՏԱԿԵԼ ՆՐԱՆՑ ՄԱԿԱՆՈՒՆՆԵՐԸ
Սեպտեմբերի 11-ից իր աշխատանքները սկսող ԱԺ նստաշրջանը լուսաբանող լրագրողների համար նոր կարգ է նախապատրաստվում։ Ըստ այդմ, մասնավորապես, նրանք կարող են զրկվել ԱԺ հավատարմագրումից, եթե խորհրդարանի գործունեության վերաբերյալ «կեղծ եւ զրպարտչական բնույթի, Ազգային ժողովի պատգամավորների անձը վիրավորող տեղեկություններ» պարբերաբար տարածեն։
Կարդացեք նաև
Կարդացեք էջ 3։
ՎՐԻԺԱՌՈՒՆԵՐԸ ՍՈՂՈՍԿԵԼ ԷԻՆ «ԻՆՏԵՐՆԵ՞Տ»
«Առավոտին» հասած լուրերի համաձայն, Հայաստանի ազգային հեռուստատեսության պաշտոնական «homepage»-ում արհեստականորեն ներմուծվել էր «Հոկտեմբերի 27-ի վրիժառուների» «Կգա հատուցման օրը» թռուցիկը։ Սակայն երեկ այն չհայտնաբերեցինք www.armtv.com հասցեում. գուցե թռուցիկն արդեն հասցրել էին վերացնե՞լ։
ԻՆՉՈ՞Ւ ՉԿԱ ՏԵՂԱԿԱԼԸ
Կենտրոնական բանկի մասին ՀՀ օրենքի համաձայն, այդ բանկի նախագահը պետք է ունենա տեղակալ, որը հաստատվում է Ազգային ժողովի կողմից։ Օրենքի հեղինակների մտահղացմամբ, տեղակալի նման բարձր կարգավիճակը պետք է որոշակի հակակշիռ հանդիսանա ԿԲ նախագահի համար։ Սակայն 98-ի փետրվարից ի վեր, երբ այդ պաշտոնում հաստատվեց Տիգրան Սարգսյանը, ԿԲ նախագահի տեղակալ այդպես էլ չի նշանակվել։
