Նյու Յորքի STRAWBERRY FIELDS-ում, որ տեղավորված է Կենտրոնական այգում, կայացավ հայ բանաստեղծների ու Ջոն Լենոնի ջերմ հանդիպումը:
Հանդիպումն, իրոք, պառնասյան մակարդակի էր, որովհետեւ ներկա չէին ոչ հայ բանաստեղծները, ոչ էլ Լենոնը: Տողերիս հեղինակը, Սամվել Մկրտչյանի անգլերեն թարգմանությամբ, հայ պոեզիայի ընտրանին տարավ ու դրեց IMAGINE հայտնի կլոր շրջանի վրա: Ու մինչ մեր պոետներն ու Լենոնը միմյանց «ձեռք էին սեղմում», այդ կողմերով անցնող մի «բոմժ» թերթեց գիրքը եւ քիչ անց հայ պոեզիայի մոլի երկրպագու դարձավ ու… խնդրեց իմ ինքնագիրը: Ինձ մեծ դժվարությամբ հաջողվեց նրան համոզել, որ ես ոչ Նարեկացին եմ, ոչ էլ նույնիսկ՝ Արմեն Դավթյանը: Գիրքը ետ վերցնելու եւ կրկին հայտնի շրջանի վրա դնելու համար առավել մեծ ջանք պահանջվեց:
ԳԵՐՄԱՆ ԱՎԱԳՅԱՆ
VERSUS ստուդիա
Հ.Գ. Այս հանդիպմանը չմասնակցած այն հայ բանաստեղծների բողոքների հոսքը, որի բացառումը առնվազն միամտություն է (վկան՝ «Հայ գրականությունը 21-րդ դարում» լոսանջելեսյան կոնֆերանսի գալիք մասնակիցների հանդեպ նրանց «արդար» ցասումը), հայտարարում եմ՝ ո՛չ ԱԳՆ-ն, ո՛չ ՀԳՄ-ն, ո՛չ նախագահական պալատը, ոչ էլ որեւէ տնային կառավարիչ այս հանդիպման հետ առնչություն չունեն: Բողոքներն ուղարկեք Սամվել Մկրտչյանին եւ Ջոն Լենոնին:
