Գեղարքունիքի մարզի Դդմաշեն գյուղի միջնակարգ դպրոցն այսուհետ կունենա ժամանակակից համակարգիչներով կահավորված դասասենյակ՝ շնորհիվ դպրոցների բարելավման ծրագրում շահած դրամաշնորհի։ Այս մասին տեղեկացանք դպրոցի տնօրեն Սեդրակ Գալստյանից։ Դրամաշնորհը՝ 6100 դոլարը, որի մեջ մտնում է 5 համակարգիչ, մեկ տպիչ եւ մեկ պատճենահանող սարք, ստանալու համար դպրոցական համայնքը պետք է կատարեր իր ներդրումը՝ 740 դոլարին համարժեք դրամ։ Վերջինս նախատեսված է համակարգչային դասարանը վերանորոգելու, կահավորելու, կադրերի վերապատրաստման եւ մեկ տարվա ուսուցման գործը կազմակերպելու համար։ Ըստ Ս. Գալստյանի՝ սկզբում անհանգիստ էին՝ կկարողանա՞ն համայնքի ներդրումն ապահովել։ Սակայն այսօր տնօրենը երախտագիտությամբ է նշում այն մարդկանց անունները, ովքեր օգնեցին։
Նիկոլայ Գրիգորյանը, որ մինչ այդ արդեն մեկ մլն դրամ ներդրել էր դպրոցի վերանորոգման համար, Վրեժ Սիմոնյանը, Հայկունի Հարությունյանը, Աղվան Ենոքյանը, Վարդան Ավետիսյանը, Գագիկ Կարապետյանը, Վահագն Սահակյանը եւ Տիգրան Պետրոսյանը լուծեցին համայնքի կողմից կատարվող ներդրման հարցը։ Իսկ Գագիկ Ստեփանյանը պարտավորվել է հոգալ համակարգիչները ինտերնետային ցանցին միացնելու ծախսերը։ Պրն Գալստյանը շնորհակալանքով նշեց նաեւ գյուղապետ Միհրդատ Ղարիբյանի եւ ծնողխորհրդի նախագահ Գուրգեն Հովհաննիսյանի աջակցության մասին։
Սեփ. լր.
