Արդեն տասը տարուց ավելի է՝ Հանրապետության հրապարակում Լենինի արձանի թափուր տեղի համար պարբերաբար անց է կացվում մրցույթ: Սակայն բազմաթիվ առաջարկներից եւ ոչ մեկն այդպես էլ քաղաքային իշխանությունների կողմից հավանության չի արժանանում: Երեկ քաղաքապետարանի ճեպազրույցում Երեւանի գլխավոր ճարտարապետ Սամվել Դանիելյանը տեղեկացրեց, որ Լենինի տեղի համար կրկին մրցույթ է հայտարարված: Ըստ նրա՝ Ճարտարապետների միության շենքում արդեն 20-ից ավելի մրցութային առաջարկներ ցուցադրված են: Գլխավոր ճարտարապետի գնահատմամբ, դրանք գաղափարական առումով զգալիորեն տարբերվում են նախորդ անգամ ներկայացվածներից: Բանախոսը երեւանցիներին կոչ արեց առաջիկա 20 օրերի ընթացքում այցելել եւ իրենց դիտողություններն ու առաջարկները ներկայացնել, որից հետո հանձնաժողովը վերջնական որոշում կկայացնի: Ս. Դանիելյանը նաեւ տեղեկացրեց, որ կառավարությունը հաստատել է Երեւան քաղաքի գլխավոր հատակագծի ծրագիրը, ինչը հոկտեմբերի 12-ին վավերացվել է ՀՀ նախագահի կողմից: Ըստ գլխավոր ճարտարապետի, ծրագրում նախատեսված բոլոր կետերը պահպանվել են, ուստի եւ շարունակվում են հատակագծի հետ կապված աշխատանքները՝ համաձայն ժամանակացույցի: 2007-ի բյուջեով միայն քաղաքաշինության բնագավառում տարբեր նախագծային աշխատանքների իրագործման համար նախատեսված է հատկացնել 1 մլրդ 168 մլն դրամ: