Քաղաքացիական անհնազանդության շարժման երեկ կազմակերպած ցույցերին մասնակցում էր նաեւ Արմավիրի մարզի Հոկտեմբեր գյուղի տարեց բնակիչ Գուրգեն Սողոմոնյանը, որն իր բողոքն արտահայտել էր գրավոր՝ ազատ բանաստեղծության տեսքով: Նրա ոտանավորի առաջին մասի յուրօրինակ «մուսան» Ազգային ժողովն է՝ դաշնամուրային իր քվեարկություններով:
«Ազգային ժողովում կատարվեց անհատական փոփոխություն, սակայն ցուցատախտակի վրա թվերը մնացին անփոփոխ,- գրում է Գուրգեն Սողոմոնյանը:- Դաշնամուր նվագողը համարվում է ազգի դավաճան»: Մեջբերենք այլ հատվածներ.
«Գարեգին Նժդեհի անվան տակ, չկար նման հիշատակ:
Աղվեսից էլ խորամանկ՝ թալանեցիք ժողովրդին, ինչպես կկուն իր ձագին:
Ի՞նչ տարբերություն թունավոր օձի կծածի եւ ճշմարտություն պահպանող անձի մեջ:
Եթե օձը չկծի, ապա աշխատանքից կազատվի:
Ճշմարտության մասին շատ խոսողին իսկույն հանձնում են հողին:
Ժողովուրդը նման է հիվանդ կատվի, եթե օրվա որսը չճարվի,
Երեկոյան ծառերի տակ կմլավի, որ ոչ ոք իրեն չտեսնի:
Առանց այն էլ փոստահան, գուցե փորեն գերեզման:
Հարգելի իշխանավորներ, հեռուստատեսությամբ հերիք է Ձեզ գովաբանել: Գյուղատնտեսական կուլտուրաների մեջ՝ դդումից մեծ գլուխ չկա:
Գյուղնախարարն էլ գյուղերում ի հայտ չի գա, որովհետեւ գարնանը սիլիտրա չկա:
Ձմռան սաստիկ ամիսներին՝ մենք խառնեցինք հանքային աղին
Եվ ցանեցինք մայրաքաղաքի նոր վերանորոգված ճանապարհների փոսերին:
Եթե հանդիպեք աղքատին, մի գուցե հիշեք խղճի դավթարին:
Դուք չեք հանդիպում աղքատին, խղճի դավթարն էլ՝ ձեր պատվին»:
