![\"\"](\"https://www.aravot.am/2011/aravot_arm/April/13/p10.jpg\")
Ապրիլի լույս 12-ի գիշերը Մինսկի մետրոյի «Օկտյաբրսկայա» կայարանում տեղի ունեցած ահաբեկչության գործով մի քանի մարդ է ձերբակալվել: Այդ մասին, ըստ ԼՁԸՀ-ՁԸհհ-ի, լրագրողներին հայտարարել է օպերատիվ-քննչական խմբի ղեկավար, գլխավոր դատախազի տեղակալ Անդրեյ Շվեդը: Հիշեցնենք, որ ահաբեկչության արդյունքում զոհվել է 12 մարդ, Մինսկի հիվանդանոցներում է գտնվում 151 մարդ, որից 40-ը՝ ծանր վիճակում, 58-ի վիճակը գնահատվում է միջին ծանրության: Վիրավորներից երկուսը հայեր են, որոնցից մեկը ՀՀ քաղաքացի է, մյուսի քաղաքացիության մասին տեղեկություններ չեն հաղորդվում:
Ավելի վաղ՝ երեքշաբթի առավոտյան, հայտարարվել էր, թե իրավապահ մարմիններին հաջողվել է ճշտել ահաբեկչությունն իրականացրած ենթադրյալ անձի ինքնությունը, կազմվել են երկու կասկածյալի ֆոտոռոբոտները, որոնք պաշտոնապես չեն հրապարակվել:
«Օկտյաբրսկայա» կայարանը գտնվում է Բելառուսի նախագահի նստավայրից 100 մետր հեռավորության վրա։ Բելառուսի նախագահ Ալեքսանդր Լուկաշենկոն երեկ արտակարգ խորհրդակցություն է հրավիրել։ Նա կարծիք է հայտնել, թե ահաբեկչությունը կարող է կապված լինել «դրսի» ուժերի հետ, մինչդեռ երկրի ներսում վերլուծաբանները կարծիք են հայտնում, թե դա ձեռնտու է իշխանություններին, որոնք դրանով փորձում են շեղել բելառուսցիների ուշադրությունը՝ երկրում առկա խնդիրներից:
Պայթյունի պատճառները հետաքննվում են։