Պատասխանելով «Առավոտի» հարցին՝ քանի որ եւ Հայաստանում, եւ Ադրբեջանում ընտրական շրջան է սկսվում, հնարավո՞ր է, որ Լեռնային Ղարաբաղի կարգավորման բանակցային գործընթացը դադարի փուլ մտնի, ԼՂՀ խորհրդարանի արտաքին հարաբերությունների հանձնաժողովի նախագահ Վահրամ Աթանեսյանը նկատեց, որ բանակցություններն արդեն իսկ փակուղում են. «Ես կարծում եմ, որ մինչեւ ընտրական գործընթացի ավարտը որեւէ մեկը փորձ չի անելու ինչ-որ լուծումներ առաջարկել: Սա, իհարկե, այն իդեալական տարբերակը չէ, որն ինքս փայփայում եմ: Ես չեմ կիսում այն տեսակետը, որ եթե ոչինչ չի փոխվում, ապա մեզ համար ամեն ինչ մնում է լավ: Համենայնդեպս, ստիպված ենք արձանագրել այն իրողությունը, որ մինչեւ 2013 թվականն անհնար է որեւէ զարգացում այս բանակցություններում, եթե, իհարկե, որեւէ ցնցում տեղի չունենա Մերձավոր Արեւելքում՝ կապված Իրանի միջուկային ծրագրի հետ կամ Ադրբեջանում ֆորս-մաժոր չգրանցվի»: Պարոն Աթանեսյանը գտնում է, որ զարգացումները էական փոփոխություն կարող են կրել կախված Իլհամ Ալիեւի՝ երրորդ անգամ նախագահ դառնալու հավակնություններից:
