Քիչ առաջ տեղեկացրել էինք, որ այսօր երեկոյան տեղի է ունեցել ՀՀԿ գործադիր մարմնի աշխատանքային նիստը, որը վարել է կուսակցության նախագահ Սերժ Սարգսյանը: Երկու ժամից ավելի տեւած նիստի ընթացքում քննարկվել են ներկուսակցական հարցեր:
ՀՀԿ խորհրդի անդամ, Հանրապետական խմբակցության քարտուղար Էդուարդ Շարմազանովը նիստից հետո լրագրողների հետ զրույցում տեղեկացրեց, որ քննարկվել են նաեւ կիրակի օրը տեղի ունեցած Իջեւանի ընտրությունները, որտեղ Հանրապետական թեկնածուն պարտություն էր կրել: Վեր են հանվել Վարուժան Ներսիսյանի` անհաջողության մատնվելու պատճառները:
Շարմազանովի փոխանցմամբ, մարզպետները ներկա չեն եղել նիստին, բայց կուսակցությունը քննարկել է նաեւ ՀՀԿ խորհրդի անդամ, Սյունիքի մարզպետ Սուրիկ Խաչատրյանի հետ կապված միջադեպը եւ որոշում է կայացրել, թե քանի դեռ խնդիրը նախաքննության փուլում է՝ որեւէ միջամտություն չպետք է արվի: ՀՀԿ-ն իր կարծիքը կհայտնի միայն նախաքննությունից հետո:
Ինչ վերաբերում է Ազգային ժողովի նոր նախագահի հարցին, Շարմազանովն ասաց. «Քանի որ նախագահը դեռեւս դե յուրե գործում է, հանրապետականները կոռեկտ չեն համարել այդ հարցն այսօր քննարկել»:
Կարդացեք նաև
ՀՀԿ խմբակցության քարտուղարը խուսափեց որեւէ մեկնաբանություն անել ՀՀ Էներգետիկայի եւ բնական պաշարների նախարար Արմեն Մովսիսյանի «շարիկ» խաղալու հետ կապված, փոխարենը կարծիք հայտնեց. «Շատ պրոֆեսիոնալ, շատ բարեխիղճ նախարար է»:
Լուսինե ԽԱՉԱՏՐՅԱՆ
