Թուրքիայի արտաքին գործերի նախարարությունը հանդես է եկել հայտարարությամբ Ֆրանսիայի Ազգային ժողովի կողմից Հայոց ցեղասպանության ժխտումը քրեականացնող օրինագծի հնարավոր ընդունման վերաբերյալ:
Ինչպես գրում է թուրքական Hurriyet-ը, Թուրքիայի ԱԳՆ-ի կողմից տարածված հայտարարության մեջ ասվում է. «Այն պահին, երբ թուրք-ֆրանսիական հարաբերությունները մտել են այնպիսի փուլ, որում մեր համագործակցությունը երկկողմ եւ միջազգային մակարդակներում կարող է ընդլայնվել, հույս ունենք, որ անշրջելի քայլեր չեն ձեռնարկվի»:
Պաշտոնական Անկարան նաեւ նշել է. «Ֆրանսիայի ղեկավարությունը քաջատեղյակ է, թե ինչքան զգայուն հարց է այն Թուրքիայի համար»:
Մեդիամաքս-ը հիշեցնում է, որ դեկտեմբերի 7-ին Ֆրանսիայի Ազգային Ժողովի օրենսդրությամբ հարցերով հանձնաժողովը ընդունել է Հայոց ցեղասպանության ժխտումը քրեականացնող օրինագծի տեքստը: Այն նախատեսում է 1 տարի ազատազրկում եւ 45.000 եվրո տուգանք Հայոց ցեղասպանությունը Ֆրանսիայի տարածքում ժխտելու համար:
