Այսօր Կապանի քաղաքապետարանում ահազանգ ստացվեց, որ քաղաքի ծայրամասային` Բաղաբուրջ եւ Բարաբաթում թաղմասերում եղեւնիներ են հատվում: Ահազանգի հեղինակը Կապանի անտառտնտեսության տնօրեն էր, ումից էլ փորձեցինք տեղեկատվություն ստանալ դեպքի առնչությամբ:
Անտառտնտեսության տնօրեն Վոլոդյա Միրզոյանի փոխանցմամբ, բնակիչներն են ծառահատումների մասին իրենց տեղյակ պահել, բայց քանի որ դեպքը համայնքի վարչական տարածքում է, ոչ թե անտառտնտեսության, ապա անտառտնտեսությունից անմիջապես տեղեկացրել են քաղաքապետարանին: «Մենք իրավասու չենք գնալ եւ կանխել եղեւնիների հատումը, քանի որ դա մեր կողմից հսկվող տարածքում չի: Դրանք անտառի եղեւնիներ չեն, այլ ծառատունկի ժամանակ աճեցրած եղեւնիներ: Նոր տարվան ընդառաջ՝ մենք անտառտնտեսության տարածքում խստացրել ենք հսկողությունը: Ներկայումս եղեւնու հատման ոչ մի դեպք չի արձանագրվել: Անցած տարի էլ այս ժամանակահատվածում խիստ հսկողություն էինք իրականացնում, որի արդյունքում հատումներ չեն եղել», – նշում է պարոն Միրզոյանը:
Դիմեցինք նաեւ ՀՀ բնապահպանության նախարարության բնապահպանական պետական տեսչության Սյունիքի տարածքային բաժնի ղեկավարին: Բաժնի պետ Լեւոն Պետրոսյանը խոստացավ հետաքրքրվել խնդրով եւ մեզ տեղյակ պահել ընթացքի մասին: Մեզ տրամադրած վերջին տեղեկատվության համաձայն՝ մասնագետները եղել են տեղերում, բայց արժեքավոր որեւէ նորություն չեն կարողացել պարզել, քանի որ տեղերում այդպես էլ չի հաջողվել գտնել հատատեղերն ու եղեւնիներ հատողներին: Պատասխանատուները խոստացան Ամանորի նախօրյակին աչալուրջ լինել եւ խիստ հսկողություն սահմանել եղեւնապատ տարածքներում:
Կարդացեք նաև
Մերի ՍՈՂՈՄՈՆՅԱՆ