Հեռուստատեսության եւ ռադիոյի ազգային հանձնաժողովի անդամ Արմեն Մկրտչյանն այսօր Աղվերանում անցկացվող «Ընտրական գործընթացների լուսաբանումը Հայաստանում» սեմինարի ընթացքում անդրադառնալով մամուլում տարածված այն լուրերին, թե ՀՌԱՀ-ն արգելել է ցուցադրել Շուշան Պետրոսյանին, քանի որ նա ընդգրկված է ՀՀԿ համամասնական ցուցակում՝ ասաց, որ արգելք չի եղել, քանի որ իրենք նման իրավասություն չունեն: Ըստ Արմեն Մկրտչյանի, ՀՌԱՀ-ն ուղղակի զգուշացրել է հեռուստաընկերություններին, որ ցանկացած թեկնածուի հայտնվելը եթերում դիտարկելու են իբրեւ քարոզչական նյութ:
Ըստ նրա, իբրեւ քարոզչություն են դիտարկվելու այնպիսի կինոնկարները, որտեղ թեկնածուների մասին կլինի դրական կամ բացասական հիշատակում. օրինակ՝ կոմունիստներին հայհոյող ֆիլմերը գնահատելու են իբրեւ հակաքարոզչություն:
ՀՌԱՀ անդամը հստակեցրեց, որ անգամ եթե հեռուստաընկերությունների կողմից իրականացվող փողոցային հարցումների ընթացքում հարցվածներից մեկը լինի կուսակցական կրծքանշանով՝ դա էլ են դիտարկելու իբրեւ քարոզչություն:
