«Միջազգային հանրությունը աչք է փակում Ադրբեջանի այսպիսի գործողությունների վրա, քանի որ գիտեն, որ այն չի վերածվի պատերազմի, քանի որ Ադրբեջանը պատրաստ չէ պատերազմի»,- այսօր հայտարարեց ռազմական փորձագետ Դավիթ Ջամալյանը և շարունակեց. «Իրադրական կայունացման միակ գործոնը մեր բանակն է: Իսկ եթե հույսներս դնենք դրսի արձագանքին, Ադրբեջանը կհամոզվի իր անպարտելիության մեջ և կդառնա ավելի լկտի»:
Դառնալով ՀԱՊԿ-ի միջամտությանը՝ պարոն Ջամալյանը նշեց, որ դրա պահը չէ, քանի որ մեր բանակը լիովին ի զորու է վերահսկելու իրավիճակը:
Դ. Ջամալյանի կարծիքով՝ Ադրբեջանի դիվերսիոն գործողությունները ապտակ են նաև միջազգային կազմակերպություններին:
Պարոն Ջամալյանը մարտական է տրամադրված: Նա նշեց. «Ադրբեջանում պետք է վստահ լինեն, որ եթե մի հատ կրակեցին, տասը ստանալու են» : Հարցին՝ արդյոք դիվերսիոն գործողությունները կապվա՞ծ էին Քլինթոնի այցի հետ և նախօրոք ծրագրված, ռազմական փորձագետը պատասխանեց. «Հայտնի է, որ այստեղ պայքար է մղվում գերտերությունների դիրքերի ամրապնդման համար, ուստի տեսականորեն կարելի է դրանք կապել իրար հետ»:
Կարդացեք նաև
Դառնալով ՀՀ ԱԳՆ-ի գործողություններին ու քայլերին՝ Դ. Ջամալյանը նկատեց. «Պետք է նախաձեռնողական մոտեցում ցուցաբերել, ԱԳ նախարարությունը հանդես եկավ հայտարարությամբ, սակայն միայն հայտարարությամբ չէ, որ պետք է սահմանափակվել: Մենք նախաձեռնողական պիտի լինենք նաև դեսպանատների աշխատանքը ակտիվացնելու, տարբեր միջազգային հանրային շրջանակների հետ աշխատելու առումով»:
Տաթև ՀԱՐՈՒԹՅՈՒՆՅԱՆ
