Երեկ երեկոյան, ժամը 17:30-ի սահմաններում, Այգեպար գյուղի մոտ ադրբեջանցիները կրակ են արձակել Ադրբեջանից Հայաստան եկած Կարմիր Խաչի ներկայացուցիչների վրա: Այս մասին, այսօր «Արմատ» ակումբում ասուլիսի ժամանակ ասաց Տավուշի մարզի Ներքին Կարմիր Աղբյուր գյուղի բնակիչ, ԵՊՀ դասախոս Ռուբեն Աբրահամյանը: Նրա տեղեկություններով, հարձակման արդյունքում զոհեր կամ վիրավորներ չեն եղել.«Նրանք եկել էին Այգեպար գյուղ, որ ծանոթանան ինչպես է տեղի ունեցել դեպքը ամսի 1-ին, երբ վիրավորել են գյուղացուն ու հենց գյուղի մեջ կրակ է բացվել»:
Պարոն Աբրահամյանի խոսքերով, Տավուշի սահմանամերձ գյուղերը հիմնականում անմշակ են , որովհետեւ գյուղացիները վախեցած են: Պարոն Աբրահամյանն ասաց, որ հատկապես Տավուշում, կրակոցները միշտ են լինում, պարզապես հիմնականում չեն լուսաբանվում:
Պաշտպանության նախարարությունից երեկ Կարմիր Խաչի ներկայացուցիչների ուղղությամբ արձակված կրակոցների մասին Aravot.am-ին ասացին, որ հստակ չեն կարող ասել, թե այդ ժամին Այգեպարում եղե՞լ են կրակոցներ, թե՝ ոչ: Մամուլի խոսնակ Մուշեղ Աղեկյանն ասաց, որ երեկ տարբեր ժամերի ու տարբեր վայրերում հնչել են կրակոցներ:
Արփինե ՍԻՄՈՆՅԱՆ
Կարդացեք նաև
