Հանքարդյունաբերության ծանր ձեռքերն արդեն հասել են Ջերմուկ: Շուտով լրանում է Բնապահպանության նախարարությանը ներկայացված ՇՄԱԳ-ի 120 օրյա ժամկետը, որով Ամուլսարի ոսկու հանքի շահագործման լիցենզիան կամ կտրվի, կամ կմերժվի: Այդ մասին փոխանցում է «Ջերմուկը հանք չի դառնա» քաղաքացիական նախաձեռնությունը՝ տեղեկացնելով նաեւ, թե այս առիթով անցյալ շաբաթների ընթացքում «Ջերմուկի զարգացման կենտրոն» ՀԿ-ի կողմից հրավիրվել էին փորձագետներ, ովքեր իրենց բացասական մասնագիտական դիրքորոշումն են հայտնել ՇՄԱԳԻ-ի վերաբերյալ:
«Ջերմուկը հանք չի դառնա» քաղաքացիական նախաձեռնությունը որպես բողոքի նշան կազմակերպում է ուսուցողական-ճանաչողական արշավ և կոչով դիմում է բոլորին միանալ արշավին: Կոչ ենք անում բոլորին միանալ մեզ և տեր կանգնել ազգային հարստությանը, քանզի սա պայքար է Սևանա լճի, երկու խոշոր ջրամբարների, ռազմավարական նշանակություն ունեցող թունելի, ողջ Սյունիք և Վայոց Ձոր մարզերի գյուղատնտեսության, Ջերմուկ առողջարանային քաղաքի, Կարմիր գրքում գրանցված կենդանիների և բույսերի ազգային հարստության և այն մարդկանց առողջության համար, ում կյանքն ու առողջությունը դրված է կասկածի տակ տվյալ տարածքում 100 տոննա ուրանային պաշարների պատճառով:
1. Մենք պահանջում ենք վերանայել բոլոր կայացված որոշումները, և ազդակիր համայնք ճանաչել Ջերմուկը:
2. Նախապատվություն տալ Ջերմուկ ազգային պարկի ստեղծմանը և բացառել որևէ կազմակերպության կողմից որևիցե հանքարդյունաբերական գործունեություն:
Կարդացեք նաև
Արշավի ընթացքում ինքներդ կտեսնեք Որոտան գետը, Սպանդարյան և Կեչուտ ջրամբարները, կվայելեք Ջերմուկի տաք ջուրը և կտեսնեք Ամուլսարի իրական պատկերը:
Հունիսի 9-ին, ժամը 09:30 մետրոյի Բարեկամություն կայարանից բոլորս կշարժվենք դեպի Ջերմուկ: Ճանապարհին մեզ կմիանան Եղեգնաձորի և Վայքի երիտասարդները ու մտահոգ քաղաքացիները, Ջերմուկի բնակիչները:
Ցանկացողները գիշերը կմնան վրանային ճամբարում, իսկ առավոտյան կվայելեն սունկ հավաքելու հաճույքն ու սնկային խորովածը:
Մյուսները նույն օրը` երեկոյան ժամը 20:00 – 21:00, կվերադառնան Երևան:
Հարկավոր է տաք հագնվել, վերցնել սնունդ և ֆոտոխցիկ, ցանկալի է ունենալ քնապարկ: Պատրաստ եղեք քայլարշավին: Վրաններ կարող եք բերել` կտրամադրվեն նաև մեր կողմից: Ուղեվարձը 2000 դ.(https://www.facebook.com/events/241186962659284/?notif_t=plan_user_joined)»,- ասված է նախաձեռնության տարածած հաղորդագրությունում:
