Հունիսի 16-ին հայ-վրացական սահմանի Բագրատաշենի անցակետով Վրաստան մուտք գործելիս «Առավոտի » թղթակիցն ավելի քան 20 րոպե անցկացրեց հերթում: Անձնագրերը ստուգող եւ կնքող սահմանապահ ծառայության աշխատակիցներն արագ եւ արդյունավետ էին գործում: Խնդիրն այն է, որ այդտեղ ընդամենը երկու անցակետ կա՝ մեկը հետիոտների, մյուսը՝ մեքենաների անցման համար:
Բոլորովին այլ պատկեր է Սադախլոյի մաքսակետում՝ կարծես Եվրոպա ես մուտք գործում: Սահման հանդիսացող կամրջի վրացական հատվածը գեղեցիկ ձեւավորված է, կամրջի եզրերը սպիտակ լարերով փակված են՝ ապահովելով մարդկանց անվտանգությունը: Վրացական մաքսակետում հերթեր չկան, քանզի անձնագրերի ստուգման, ելումուտի թույլտվության կնքման «պատուհանները » բազմաթիվ են: Վրացիները արդիական չափանիշներին համապատասխան մաքսակետ կառուցելով՝ չեն քանդել դրա կողքին գտնվող ադրբեջանական հին գերեզմանատունը, այն պահպանվում է: Ակամայից հիշում եմ Երեւանում կատարվող շինարարությունների ժամանակ քանդվող մեր պատմաճարտարապետական կոթողները:
Ժամը 18-ի սահմաններում Վրաստանից Հայաստան մտնող մեքենաների մեծ կուտակում կար: Բագրատաշենի անցակետի աշխատողները մեքենաների եւ մարդկանց հերթերը բացատրեցին այն բանով, որ օրը շաբաթ է, հանգստյան օրերին Հայաստանի մեծ թվով քաղաքացիներ Վրաստանի լողափեր են մեկնում: Մխիթարականն այն է, որ սկսվել է Բագրատաշենի մաքսակետի կառուցապատումը, արդիականացումը :
Ոսկան Սարգսյան
