Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանի դատավոր Լյովա Ավետիսյանի նախագահությամբ այսօր վերսկսվեց «Հայինկասացիայի» գլխավոր հաշվապահի տեղակալ Սաթենիկ Սարգսյանի, գլխավոր հաշվապահ Անահիտ Գրիգորյանի, Աղավնի Խաչատրյանի, Արմինե եւ Արման Գրիգորյանների, Սարգիս Դանիելյանի նկատմամբ հարուցված քրեական գործի դատաքննությունը:
Ս.Սարգսյանն ու Ա.Գրիգորյանը դեռ կալանավորված են եւ դատարան բերվեցին ԱՆ «Աբովյան» քրեակատարողական հիմնարկից:
Այսօր նախորդ նիստում ցուցմունք տված Անահիտ Գրիգորյանը պիտի պատասխաներ դատավարության կողմերի հարցերին:
Նրա հարցաքննությունը, որն իրականացնում էր մեղադրող Հարություն Հարությունյանը, ընդհատվեց, քանի որ Ա.Գրիգորյանի պաշտպանի, ՀՀ փաստաբանների պալատի անդամ Վարդուհի Էլբակյանի առողջական վիճակը տեղի տվեց: Փաստաբանի մոտ սրտի զարկերն արագ էին, եւ նրա ճնշումը բարձրացել էր:
Կարդացեք նաև
Նշենք, որ Սաթենիկ Սարգսյանի պաշտպանը, փաստաբան Ռուբեն Բալաբանյանն ընդհանրապես ի վիճակի չէր եղել դատարան գալ եւ զանգել էր, զգուշացրել, որ վատառողջ է, հետեւաբար, նիստին մասնակցել չի կարող:
Մինչ այդ, Ա.Գրիգորյանը հասցրել էր առաջադրված մեղադրանքում իրեն մեղավոր չճանաչել, միայն ընդունեց, որ «Հայինկասացիայի» ղեկավարների գիտությամբ եւ հանձնարարությամբ՝ հանգուցյալ Վիկտոր Գրիշյանի, նրա տեղակալ Ռուբեն Սիմոնյանի, Սաթենիկի հետ են կատարել 187 միլիոն դրամի յուրացումը: Մեղադրողի հարցին, թե եղե՞լ է պայմանագիր գումարների դուրս գրման մասին, ամբաստանյալը հեգնեց. «Հափշտակության համար ի՞նչ պայմանագիր»:
Անահիտ Գրիգորյանն ասաց, որ իրեն վերագրված հաշվապահական փաստաթղթերի՝ վճարման հանձնարարագրերի կեղծումը ճիշտ չէ, քանի որ իր ստորագրությունները չկան, հետեւաբար՝ խոսք չէր կարող լինել կեղծիքի մասին:
Հիշեցնենք, որ այս գործով Ա.Գրիգորյանը մեղադրվում է 600 դրվագով:
Նա տառապում է շաքարային դիաբետ 2-րդ տիպի ծանր հիվանդությամբ, իսկ կալանավորման ժամանակ կորցրել է մեկ աչքի տեսողությունը:
Ռուզան ՄԻՆԱՍՅԱՆ
