Երկու տարի է Հայաստանը ղեկավարում է Սեւծովյան տնտեսական համագործակցության տեղեկատվական տեխնոլոգիաների խումբը: Այսօր «Կոնգրես» հյուրանոցում տեղի ունեցավ Սեւծովյան տնտեսական համագործակցության կազմակերպության աշխատանքային խմբի հանդիպումը, որին մասնակցում էին Վրաստանի, Բուլղարիայի, Հունաստանի, Ռուսաստանի, Ուկրաինայի ներկայացուցիչները: Անցյալ տարի դեկտեմբերին նոր ռազմավարություն է մշակվել, որտեղ ներկայացված են եղել մեր երկրի շահերը:
Aravot.am-ի հետ զրույցում Ձեռնարկությունների ինկուբատոր հիմնադրամի տնօրեն Բագրատ Ենգիբարյանն ասաց, որ Սեւծովյան տնտեսական համագործակցության կազմակերպության անդամ են նաեւ Թուրքիան ու Ադրբեջանը, ուստի ամեն ինչ չէ, որ այդ ոլորտում հարթ է անցնում, բայց պարոն Ենգիբարյանը վստահեցրեց, որ ռազմավարության մեջ կարողացել են Հայաստանի բոլոր հետաքրքրությունները ներկայացնել: Բագրատ Ենգիբարյանի խոսքերով. «Հայաստանի համար լավ հնարավորություն է մուտք գործել սեւծովյան համագործակցության երկրների շուկաները, որովհետեւ դա շատ լավ պլատֆորմ է, նոր շուկաներ բացելու համար: Հունաստանում, Բուլղարիայում, Ռումինիայում հայկական տեղեկատվական տեխնոլոգիաների կազմակերպություններն այդքան ակտիվ չեն, օրինակ` Ռուսաստանում եւ Ուկրաինայում ակտիվ են, բայց շատ երկրներում ուղղակիորեն մենք չկանք, իսկ սա շատ լավ ու կարեւոր հնարավորություն է մեզ համար: Այս երկրները օգտվում են Եվրամիության շատ մեծ աջակցությունից եւ ունեն շատ մեծ քանակության խնդիրներ, որ իրենք չեն կարողանում լուծել եւ իրենք են հետաքրքրված հայկական կազմակերպությունների հետ համատեղ 3-րդ շուկաների համար ծրագրեր անել»:
Հանդիպման ընթացքում հայկական կողմը ներկայացրեց մեկ տարվա ընթացքում տեղեկատվական տեխնոլոգիաների ոլորտում տեղի ունեցած ձեռքբերումները:
Լուսինե ԲՈՒԴԱՂՅԱՆ
