Հայ մեծ գեղանկարիչ Մինաս Ավետիսյանի «Հայկական հովվերգություն» որմնանկարի վերականգնումն ավարտին չհասավ: Իտալացի մասնագետները հեռացել են, քանի Գյումրու քաղաքապետարանը խոստացած գումարի մի մասը չի տրամադրում:
«Մենք պետք է շարունակեինք աշխատանքները՝ որմնանկարները քաղաքապետարանի շենք փոխադրելու։ Վերջնական վերանորոգման աշխատանքներ պետք է այնտեղ կատարվեին, բայց չարվեց։ Իտալացիները այսօր գնացել են»,- «Ա1+»-ի հետ զրույցում ասաց «Մինաս Ավետիսյան» հիմնադրամի տնօրեն Ազատ Թովմասյանը։
Դեռևս փետրվարի 2-ին Գյումրու քաղաքապետարանի և «Մինաս Ավետիսյան» հիմնադրամի միջև կնքվել էր պայմանագիր մեծանուն նկարչի ամենամեծ որմնանկարը՝ «Հայկական հովվերգությունը» վերեկանգնելու համար:
Աշխատանքների ավարտից հետո այն պետք է տեղափոխվեր Գյումրու քաղաքապետարան: Վերականգնման համար նախատեսված 55 մլն դրամի մի մասը պարտավորվել էր վճարել հենց Գյումրու քաղաքապետարնը:
«Այսօր, երբ մենք համարյա ավարտում ենք աշխատանքները, 6 մլն դրամ պակաս է վճարված, ինչպես նաև ևս մոտ 6 մլն դրամ իրենց կողմից չկատարված աշխատանքների դիմաց, որը կատարել ենք մենք՝ հետագայում ստանալու ակնկալիքով»,-ասաց հիմանդրամի տնօրենը։
Ազատ Թովմասյանի խոսքերով՝ քաղաքապետարանը գումարը վճարելուց չի հրաժարվում, բայց չի էլ վճարում եւ պատճառաբանում է՝ գումար չկա։ Խնդրի մասին Հիմնադրամը տեղյակ է պահել Կառավարությանը եւ Մշակույթի նախարարությանը: Պատասխան դեռևս չկա։
«Դատական պրոցեսներ առայժմ չենք ձեռնարկում, որովհետև իրենք հիմա էլ ասում են, թե մոտ ժամանակներս կվճարեն և մենք այդ աշխատանքները կկատարենք»,- ասաց Ազատ Թովմասյանը։ Սակայն եթե նույնիսկ Գյումրու քաղաքապետարանը գումարը վճարի այս ամսվա ընթացքում, ապա իտալացի մասնագետներն այլեւս հետ չեն գա։
Մանրամասները կարդացեք այստեղ: