Այսօր Aravot.am-ը ՀՀԿ Շիրակի մարզային կառույցի ղեկավար Սահակ Մինասյանից հետաքրքրվեց, թե Գյումրու նախկին քաղաքապետ Վարդան Ղուկասյանն ու իր թիմակիցները շարունակո՞ւմ են մնալ որպես ՀՀԿ-ականներ , թե՞ խռովել ու համատարած լքել են իշխող կուսակցության շարքերը:
Հիշեցնենք, որ ՀՀԿ Շիրակի մարզային կառույցը երկար ժամանակ գլխավորում էր հենց Վարդան Ղուկասյանը, սակայն «Շիրակ» ֆուտբոլային ակումբի սեփականատեր, ՀՀԿ-ական Արման Սահակյանին ԱԺ հերթական ընտրությունների ժամանակ նորմալ չսատարելու, նրան պարտության մղելու պատճառով Ղուկասյանի ձեռքից անմիջապես վերցրեցին կուսակցական այս պաշտոնը: «Վարդան Ղուկասյանը ինքը կուսակցական է, բայց ես չեմ կարող պատասխանել ձեր հարցին. թիմակից ասելով ո՞ւմ ի նկատի ունեք»,- հարցրեց պարոն Մինասյանը: Մեր հիշեցմանը, որ Գյումրու նախորդ քաղաքապետը ՀՀԿ-ական էր դարձրել իր մոտ ընկերներին, քաղաքապետարանի ու վերջինիս ենթակայության տակ գտնվող կառույցների` մանկապարտեզների, երաժշտական դպրոցների գրեթե բոլոր աշխատակիցներին, բացառությամբ կոմունիստ փոխքաղաքապետ Գագիկ Մանուկյանի, ով սակայն պարտաճանաչորեն մասնակցում էր ՀՀԿ կառույցի բոլոր միջոցառումներին, Սահակ Մինասյանն այսպես արձագանքեց. «Հունիսից մինչև էսօր մեր մարզխորհուրդը և շրջանային խորհուրդները կուսակցությունից դուրս եկող ոչ մի պաշտոնյայի դիմում չեն քննարկել, սա նշանակում է, որ ձեր ասած խավը մնում է կուսակցության մեջ, և հիմա դեկտեմբերի 2-ին սպասվող ընտրություններին մանկապարտեզի վարիչներ, մշակութային հաստատությունների տնօրեններ ակտիվ մասնակցություն են ունենալու, և դրա համար թիմ , որպես այդպիսին, որակել նախորդ քաղաքապետի , որն այս կուսակցության անդամ է , ես չեմ տարանջատում: Մեր կուսակցական գործընկերները իրենց մասնակցությունն ունեն նոր մոտեցումներով»:
Մենք դարձյալ հետաքրքրվեցինք` արդյո՞ք Վարդան Ղուկասյանը ակտիվ մասնակցություն ունի կուսակցական գործերին, հաճախո՞ւմ է նիստերին, ինչ-որ բան անո՞ւմ է Հանրապետականի համար, թե պարզապես նրա անուն-ազգանունը, որպես հանրապետականի, դեռ գրանցված է կուսակցության փաստաթղթերում: «Վարդան Ղուկասյանը որպես անձ, որպես քաղաքացի այս պահին սատարում է Արման Սահակյանին», -վստահեցրեց Սահակ Մինասյանը: Այդ ինչպե՞ս. Վարդան Ղուկասյանն արդեն ընդունո՞ւմ է իր մեղքը, որ ինքը ԱԺ հերթական ընտրությունների ժամանակ նորմալ չսատարեց ՀՀ նախագահի փեսայի ընկերոջը, այդ պատճառով էլ վերջինս խորհրդարան չմտավ, իրեն էլ պատժեցին, ՀՀԿ Շիրակի մարզային կառույցի պատասխանատուն կրկնեց . «Վարդան Ղուկասյանի հետ անձամբ իմ կողմից նման խնդիր չի քննարկվել , թե սատարել է, ինչպես է սատարել , ինչպես է հիմա սատարում, բայց որ հիմա նա, որպես անձ ու քաղաքացի, սատարելու է Արման Սահակյանին, ես այդ մասին իրազեկված եմ»:
Նունե ԱՐԵՎՇԱՏՅԱՆ
Կարդացեք նաև
