Դեռևս պաշտոնապես չհաստատված տվյալներով, Շիրակի մարզում Սերժ Սարգսյանի շտաբը գլխավորելու են մարզպետարանի երկու ազդեցիկ պաշտոնյաներ` մարզպետարանի կրթության վարչության պետ, ՀՀԿ Շիրակի մարզային կառույցի նորընտիր ղեկավար Սահակ Մինասյանն ու նույն կուսակցությունում նրա տեղակալ, փոխմարզպետ Սեյրան Պետրոսյանը: Փաստորեն՝ Սերժ Սարգսյանը երկու շտաբ է ունենալու Շիրակի մարզում:
Սեյրան Պետրոսյան
Փոխմարզպետ Սեյրան Պետրոսյանը, որը ծնունդով Աշոցքից է, և մեծ ազդեցություն ունի գյուղերում, գլխավորելու է Շիրակի մարզի բոլոր համայնքները` առանց Գյումրիի: Նա, ըստ Շիրակի մարզպետ Աշոտ Գիզիրյանի խորհրդական Արաքսյա Կիրակոսյանի, հունվարի 20-ից այս նպատակով արձակուրդ կվերցնի:
Իսկ Գյումրին, որտեղ իրոք բարդ է կառավարելը, որովհետև գյումրեցիներն անկանխատեսելի են, գործող իշխանություններին չեն վստահում ու սա ցուցադրեցին ԱԺ ընտրություններում`ձայները տալով ԲՀԿ-ին, իշխող կուսակցությանն էլ պարտության մատնելով, նախագահի շտաբը կգլխավորի ընտրական գործընթաց կազմակերպելու մեծ փորձ ունեցող Սահակ Մինասյանը: Նշենք, որ վերջինս մի քանի ամիս առաջ ՀՀԿ Շիրակի մարզային կառույցի ղեկավար ընտրվեց Գյումրու քաղաքապետ Վարդան Ղուկասյանի փոխարեն:
Կարդացեք նաև
Անցած նախագահական ընտրություններին ևս Սահակ Մինասյանը, մարզպետ Լիդա Նանյանի հետ համատեղ, գլխավորում էր Սերժ Սարգսյանի նախընտրական շտաբը Շիրակի մարզում: Հավելենք նաև, որ բոլոր համայնքներում նախընտրական աշխատանքները կազմակերպելու նպատակով արդեն իսկ աշխատանքային խմբեր են ստեղծվել:
Նունե ԱՐԵՎՇԱՏՅԱՆ
