Ինչո՞ւ են մարզերում հսկայական փողեր ծախսվում
Փետրվարի 10-ին Երեւանի «Նաիրի» բժշկական կենտրոնից դուրս է գրվել Իջեւանի բժշկական կենտրոնի տնօրեն Հրաչյա Ներսիսյանը: Այդ մասին « Առավոտի» թղթակիցը տեղեկացավ «Նաիրի» բժշկական կենտրոնից: Հրաչյա Ներսիսյանը լեղապարկի հեռացման վիրահատության է ենթարկվել; Մեր տեղեկություններով՝ լապորասկոպիկ եղանակով վիրահատությունը կատարել է ճանաչված վիրաբույժ Անդրանիկ Ադամյանը:
Նշենք, որ Տավուշի մարզի 2005-2008 թվականների զարգացման ծրագրով Իջեւանի հիվանդանոցը ձեռք է բերել լապորասկոպիկ վիրահատության սարք: Սակայն այն սկսել են կիրառել միայն Իջեւանի բժշկական կենտրոնի նորոգումից հետո:
Ինչպես տեղեկացնում է Տավուշի մարզպետարանի ինտերնետային կայքը, ՀՀ առողջապահության նախարարության աջակցությամբ, «Նաիրի» բժշկական կենտրոնի հետ ձեռք բերված պայմանավորվածության համաձայն, այդ հիվանդանոցի լապորասկոպիկ վիրաբուժության ամբիոնի վարիչ, բժշկական գիտությունների դոկտոր Անդրանիկ Ադամյանը 2011 թվականից Իջեւանի բժշկական կենտրոնում լապորասկոպիկ վիրահատություններ է կատարում: Սակայն Հրաչյա Ներսիսյանը գերադասել է վիրահատվել Երեւանում:
Կարդացեք նաև
Նշենք, որ Իջեւանի բժշկական կենտրոնը հիմնանորոգելու, արդիական սարքավորումներով հագեցնելու համար Համաշխարհային բանկի տրամադրած վարկային միջոցներից ծախսվել է 2.3 միլիոն դոլար: 2010թ. ապրիլի 9-ին Իջեւանի բժշկական կենտրոնի հանդիսավոր բացմանը մասնակցել է ՀՀ նախագահ Սերժ Սարգսյանը: Կենտրոնի բացման արարողության ժամանակ ՀՀ առողջապահության նախկին նախարար Հարություն Քուշկյանն ասել է, որ Իջեւանի բժշկական կենտրոնի անձնակազմը վերապատրաստված է, բացի դրանից՝ Երեւանից լավագույն մասնագետները խորհրդատվության համար կգնան այնտեղ, որ բոլոր մարզերն էլ կարիք ունեն նման բարձրակարգ հիվանդանոցների:
2012թ. Տավուշի մարզ այցելած առողջապահության նախարար Դերենիկ Դումանյանը հայտարարել է, որ 2012թ. իջեւանցի 50 հղի կին գերադասել է ծննդաբերել ոչ թե հիմնանորոգված եւ սարքավորումներով հագեցած Իջեւանի բժշկական կենտրոնում, այլ շենքային ոչ այնքան բարվոք վիճակում գտնվող Դիլիջանի բժշկական կենտրոնում:
Ոսկան ՍԱՐԳՍՅԱՆ
