Խնդրի հետեւանքները փոքր-ինչ մեղմելու համար առաջիկայում Վանաձորի տարածքով հոսող գետերը կմաքրվեն կենցաղային աղբից:
Առաջիկայում Վանաձոր քաղաքի տարածքով հոսող Տանձուտ, Փամբակ, Վանաձոր գետերի հուները հնարավորություն կլինի մաքրել կենցաղային աղբից, թաց տիղմից ու քարերից:
Այդ մասին Aravot.am-ի հետ հարցազրույցում տեղեկացրեց Վանաձորի քաղաքապետարանի կոմունալ տնտեսության եւ բարեկարգման բաժնի գլխավոր մասնագետ Անահիտ Իշխանյանը` նշելով, որ մարտի վերջերին Վանաձորի քաղաքապետարանում իրականացվելիք «Գետերի հուների մաքրման աշխատանքներ» ծառայության գնման մրցույթով էլ հիմք կդրվի այդ աշխատանքներին:
«Հաղթող ճանաչված կազմակերպությունը քաղաքի բյուջեից ֆինանսավորմամբ կմաքրի ոչ միայն գետերի հունը, այլ նաև կուտակված աղբը: Աշխատանքները կիրականանան հետեւյալ կերպ` գետի հունի կենցաղային աղբի մաքրում ձեռքով, կենցաղային աղբի բարձում ինքնաթափին, տեղափոխում, գետի հունի մաքրում բուլդոզերով, տեղափոխում, թաց տիղմի եւ քարերի բարձում, տեղափոխում»,-ասում է Անահիտ Իշխանյանը:
Կարդացեք նաև
Նա նկատում է, որ մրցույթի ավարտից հետո արդեն այս տարվա ապրիլից կսկսվեն մաքրման աշխատանքները:
«Աշխատանքները կսկսվեն ապրիլից, քանի որ գետերի մաքրության վիճակը շատ վատ է»,-հրատապության պատճառների մասին է պատմում Անահիտ Իշխանյանը` բացատրելով, որ գետերի աղտոտման հետեւում հիմնականում բնակիչների անբարեխիղճ վերաբերմունքն է:
«Խնդրի վերջանական լուծման համար անհրաժեշտ է, որ գետի հարևանությամբ ապրող մարդիկ կենցաղային աղբը չթափեն գետի մեջ, խղճով վերաբերվեն շրջակա միջավայրին»,-եզրափակում է գլխավոր մասնագետը:
Անուշ ԲՈՒԼՂԱԴԱՐՅԱ Ն
