Նոյեմբերյան քաղաքի մի քանի բնակիչներ, ովքեր հաշվառված են որպես հոգեկան հիվանդ, «Առավոտի» թղթակցին բողոքել են, որ պետպատվերով իրենց հասանելիք անվճար դեղորայքը չեն ստացել, այդ պատճառով իրենք գիշերները չեն քնում, նյարդային ապրումների մեջ են անցկացնում: Այս հարցով դիմեցինք Նոյեմբերյանի բժշկական կենտրոնի տնօրեն Աշոտ Գյոզալյանին:
Նա ասաց, որ հոգեկան հիվանդներին պետպատվերով դեղորայքը տրվում է առողջապահության նախարարության կողմից, որ իրենց բուժհիմնարկը ֆինանսական միջոցներ չունի հոգեկան հիվանդների համար դեղորայք գնելու համար: Տավուշի մարզպետարանի առողջապահության վարչության պետ Կարինե Դովլաթբեկյանն ասաց, որ իրենք հոգեկան հիվանդների համար կենտրոնացված կերպով դեղեր են ստանում,այն բաշխում են Տավուշի մարզի տարածաշրջաններին, մարզի հոգեկան հիվանդների համար նախատեսված դեղերի չափաքանակի նվազում չի եղել:
ՀՀ առողջապահության նախարարության դեղերի քաղաքականության բաժնից էլ հայտնեցին, որ իրենք Տավուշի մարզի հոգեկան հիվանդների համար նախատեսված դեղերի նախավերջին եւ վերջին խմբաքանակները մարզ են ուղարկել փետրվարի 6-ին եւ մարտի 26-ին:
Առողջապահության նախարարությունից հայտնեցին նաեւ, որ երբեմն մարզեր ուղարկված դեղորայքի ըստ տարածաշրջանների բաշխումը ձգձգումներով է կատարվում:
Կարդացեք նաև
Ոսկան ՍԱՐԳՍՅԱՆ
