Նոր Հաճն քաղաքի թիվ 1 հանրակացարանի բնակչուհի, 1965թ. ծնված Եվգենյա Կարախանովային մեղադրանք է առաջադրվել այն բանի համար, որ նա 2012թ. օգոստոսի սկզբին նախնական հանցավոր համաձայնության գալով Գեղարքունիքի մարզի Դպրաբակ գյուղի բնակիչ Վովա Սարգսյանի հետ, Իջեւան քաղաքում խաբեությամբ, վստահությունը չարաշահելու միջոցով Այգեհովիտ համայնքի մաս կազմող Կայան ավանի բնակիչ Համլետ Փիրումյանից հափշտակել է 870 հազար դրամ:
Դրանից հետո Կարախանովան Վովա Սարգսյանի հետ, վերավաճառելու եւ գումարը հափշտակելու նպատակով Իջեւան քաղաքի բնակիչ Արտակ Խաչատրյանից հափշտակել է 2 միլիոն 275 հազար դրամ արժողությամբ ոսկե զարդեր:
Կարախանովան Վովա Սարգսյանի հետ հանցավոր համաձայնության գալով, նույն կերպ Իջեւանի բնակչուհի Զարինե Սարհատյանից հափշտակել է 899 հազար դրամի արծաթե զարդեր, Իջեւանի բնակիչ Տիգրան Պապյանից՝ 150 հազար դրամ արժեքով ոսկե շղթա, իջեւանցի Սեդա Աբազյանից՝ 84 հազար դրամ արժողությամբ տարբեր հագուստներ:
Եվգենյա Կարախանովան նախկինում դատված չէ, նա կալանավորված է:
Կարդացեք նաև
Կարախանովային մեղադրանք է առաջադրվել ՀՀ քրեական օրենսգրքի 178 հոդվածի 2-րդ մասով («Խոշոր չափերի խարդախություն»): Այս հոդվածով նախատեսվում է տուգանք՝ նվազագույն աշխատավարձի հինգհարյուրապատիկից հազարապատիկի չափով կամ ազատազրկում՝ 2-5 տարի ժամկետով:
Ուշագրավ է, որ Կարախանովային դատարանում պաշտպանելու է հանրային պաշտպանի գրասենյակի իջեւանցի փաստաբանը՝ անվճար հիմունքներով: Կարախանովան պաշտպանին ասել է, որ իր «գործընկեր» Վովա Սարգսյանը ծախսել է իրենց հափշտակած գումարները, որ Վ. Սարգսյանը ձերբակալված է Ուկրաինայում: Մեր տեղեկություններով՝Կարախանովան նախկինում եղել է Ադրբեջանի բնակիչ: Այս գործով դատական առաջին նիստը նշանակված է ապրիլի 4-ին:
Ոսկան ՍԱՐԳՍՅԱՆ
