Կենտրոն եւ Նորք-Մարաշ վարչական շրջանների ընդհանուր իրավասության դատարանում, ուր շարունակվեց Հայաստանի քաղաքագետների միության նախագահ Հմայակ Հովհաննիսյանի դեմ հարուցված քրեական գործի դատաքննությունը, պաշտպանի բանավոր հայտարարությանը, թե բացարկ է հայտնում դատարանին, չհետեւեց գրավոր միջնորդությունը:
Դատարանը նրան 10 րոպե ժամանակ էր տվել՝ բացարկի միջնորդության հետ կապված, սակայն Հմայակ Հովհաննիսյանի պաշտպան Գեորգի Գուլքանյանը ընդմիջումից հետո շարունակեց միջնորդություններ անել:
Մասնավորապես՝ նա միջնորդեց դատարան հրավիրել «Քանաքեռ-Զեյթուն» հիվանդանոցի բուժքրոջը: Դատավորի ռեպլիկին՝ գիտե՞ք արդյոք քանի բուժքույր կա, հետեւեց պաշտպանի փնտրտուքը՝ բուժքրոջ տվյալները գտնելու համար: Վերջապես գտնվեց բուժքրոջ ազգանունը՝ Սարգսյան, սակայն հիմա էլ հարկ եղավ որոնել անունը: Դատախազ Վ. Մուրադյանը առարկեց միջնորդության դեմ, ասելով. «Դատարանը չի կարող վիրտուալ վկա հրավիրել»: Դատարանը մերժեց այդ միջնորդությունը, քանի որ ամբողջական տվյալներ չկային:
Հետեւեց երկրորդ միջնորդությունը՝ հրավիրել հերթապահ ոստիկանության Կենտրոնականի բաժնի պետի հերթապահ մասի օգնականին: Այդ օգնականի տվյալներն էլ պաշտպանական կողմը ներկայացրեց թերի: Հմայակ Հովհաննիսյանի կողմը միջնորդեց քննչական փորձարարություն անել, զննել տեղանքը: Իսկ երբ դատավոր Գագիկ Պողոսյանը փորձեց ճշտել, թե ո՞ր օրենքով, պաշտպան Գուլքանյանն ասաց՝ օրենքն էլ դուք գտեք:
Կարդացեք նաև
Հմայակ Հովհաննիսյանը տեղից բարձրաձայնեց, որ ինքը երկրորդ անգամ է դատարանում՝ մեկ անգամ եղել է «Հոկտեմբերի 27»-ի գմործով որպես տուժող եւ հիմա արդեն՝ որպես ամբաստանյալ: Նա պնդում էր, որ դատարանը պետք է շինծու գործը քանդի, իսկ դատարանը սպառնաց սանկցիա կիրառել՝ առանց դատարանի թույլտվության կարծիք հայտնելու համար:
Դատարանը մերժեց եւ այդ միջնորդությունը՝ նկատի ունենալով այն, որ դեռ ամբաստանյալը ցուցմունք չի տվել, որով կհիմնավորվեր տեղանքի զննություն անցկացնելու անհրաժեշտությունը: Դատական նիստը դարձյալ ընդմիջվեց:
Հիշեցնենք, որ Հ. Հովհաննիսյանը մեղադրվում է Մոսկովյան 33 հասցեում անցյալ տարվա ապրիլին «Հայհիդրոէներգոնախագիծ» ՓԲ ընկերության նախագահ Սենիկ Ջուլհակյանին հրելու եւ մարմնական վնասվածք հասցնելու համար:
Ռուզան ՄԻՆԱՍՅԱՆ
