ՏՄՊՊՀ նախագահը վստահեցնում է, որ զոքանչի անունով էլ բիզնես չունի ու չի ուզում ունենալ:
Այսօր Aravot.am-ը Տնտեսական մրցակցության պաշտպանության պետական հանձնաժողովի նախագահ Արտակ Շաբոյանին հարցրեց՝ Դուք որեւէ բիզնես չունե՞ք:
Կարդացեք նաև
Նա վստահեցրեց, որ չունի. «Նախ առաջինը ես չունեմ, եւ չի էլ թույլատրվում օրենսդրությամբ: Ես որ ունենայի՝ հաստատ կիմանային»: Մենք ճշտեցինք՝ զոքանչի անունո՞վ էլ չունեք: Արտակ Շաբոյանը պատասխանեց. «Չունեմ, չեմ ունեցել եւ չեմ էլ ուզում ունենալ, անկեղծ ասած»: Մեր զարմանքին՝ ինչո՞ւ չեք ուզում ունենալ բիզնես, հանձնաժողովի նախագահը այսպիսի պատասխան տվեց. «Դե որովհետեւ պետք է իմ ռեսուրսները շատ սահմանափակ լինեն: Եվ ընդհանրապես ես կարծում եմ, որ պաշտոնյաները պետք է ավելի շատ իրենց ռեսուրսները աշխատանքին ուղղեն»:
Ավելին, պարոն Շաբոյանը վստահեցրեց, որ իր աշխատավարձը իրեն լիուլի բավարարում է, նա նույնիսկ իր գոհունակությունը հայտնեց իր ստացած աշխատավարձի համար. «Նախկինում չէր բավարարում աշխատավարձը, հիմա իմ աշխատավարձը բավականին բարձրացել է: Ոչ միայն իմ, նաեւ հանձնաժողովի անդամների աշխատավարձը: Եթե համեմատության մեջ նայենք քաղծառայողների աշխատավարձի հետ, կարծում եմ, բավարար է, նորմալ է»:
Նշենք, որ պարոն Շաբոյանի «նորմալ աշխատավարձը» 720 հազար դրամ է: Ավելի քան 2 անգամ բարձր՝ պատգամավորի աշխատավարձից:
Երբ աշխատավարձերից խոսք գնաց, ՀՀԿ պատգամավոր Վարդան Այվազյանը միջամտեց՝ ասելով, թե պատգամավորների աշխատավարձը ընդամենը 250 հազար դրամ է: Մեր դիտարկմանը, որ պատգամավորների աշխատավարձը սահմանված է 300 հազար դրամ՝ պարոն Այվազյանը վստահեցրեց, որ պահումներով հազիվ 250 հազար են ստանում:
Հռիփսիմե ՋԵԲԵՋՅԱՆ
