Կենտրոն եւ Նորք-Մարաշ վարչական շրջանների ընդհանուր իրավասության դատարանում, Էդիկ Ավետիսյանի նախագահությամբ այսօր լսվեց Վարդգես Գասպարիի հայցը ՀՀ ոստիկանության եւ ֆինանսների նախարարության դեմ: Վարդգես Գասպարին հայտնեց, որ 2011թ. մարտի 3-ին Հանրապետության հրապարակից բերման է ենթարկվել ոստիկանության բաժին՝ տրանսպորտի աշխատանքը խոչընդոտելու եւ ոստիկանության գործունեությունը խանգարելու մեղադրանքով: Ոստիկանությունը ապրիլի 22-ին դիմել էր դատարան՝ Գասպարիի կողմից վարչական իրավախախտում կատարելու վերաբերյալ:
Վ. Գասպարին հայտնեց, որ ինքը հանդիսանում է «ՎԱԼ օթոմեյշն» ՍՊ ընկերության տնօրեն եւ 15 ամսվա դատաքննության արդյունքում ինքը կրել է բիզնեսում վնաս, քանի որ իր մտավոր էներգիան կորցրել է իրավական ակտերը ուսումնասիրելու պատճառով:
Գասպարին պահանջում է 850000 դրամ վնասի հատուցում: Նա ներկայացրեց 2010, 2011թթ. բիզնես-շարժը. եթե 2010թ. 3 մլն-ից ավելի շահույթ էր ստացել, ապա 2011-ին այն կազմել էր 1.129.000 դրամ:
Ֆինանսների նախարարության ներկայացուցիչը առարկեց հայցի դեմ, անդրադառնալով հատուցման մեխանիզմին, ասաց, որ Գասպարին չի ներկայացրել վարչական մարմինների գործունեության իրավաչափության հետ կապված փաստաթղթեր:
Կարդացեք նաև
Նկատենք, որ 15 ամիս գործը դատարանում ձգձգելուց հետո ոստիկանությունը հրաժարվել է հայցից եւ վարույթը կարճվել էր: Ոստիկանության ներկայացուցիչ Էդուարդ Պետրոսյանը այսօր հաստատեց, որ դատարան է ներկայացվել ինչպես ոստիկանության վերոնշյալ հայցը, այնպես էլ վարույթը կարճելու մասին որոշումը: Դատաքննությունը համարվեց ավարտված: Մայիսի 13-ին կհրապարակվի այդ գործով դատական ակտը:
Ռուզան ՄԻՆԱՍՅԱՆ
