Մոսկվայի նկարիչների ասոցիացիայի ցուցասրահում հունիսի 3-ին բացվել է հայազգի նկարիչ Էդուարդ Մանուկյանի անհատական ցուցահանդեսը: Հայտնում է «Գալերիքս» կայքը:
Երիտասարդ նկարիչը Սևան քաղաքից է, այժմ ապրում և աշխատում է Մոսկվայում: Հետևելով իր ծնողներին, որոնք նույնպես նկարիչներ են, Մանուկյանը ավարտել է Երևանի գեղարվեստի ակադեմիան:
Տեղափոխվելով Մոսկվա՝ Մանուկյանը ակտիվ մասնակցում է տարբեր ցուցահանդեսների, որոնք անցկացվում են և՛ Մոսկվայում, և՛ Ռուսաստանի այլ քաղաքներում:
Նկարչի համար 2013թ. բեկումնային է: Մոսկվայում նա անհատական երեք ցուցահանդես է ունեցել, ինչպես նաև հաղթել է «Երիտասարդ նկարիչներ» մրցույթում:
Կարդացեք նաև
Այս ցուցահանդեսում ներկայացված է նկարչի մոտ 70 տարաբնույթ աշխատանք: «Գալերիքս»-ը գրում է՝ նկարչի կերտած պատկերները ուշադրություն են գրավում իրենց հստակությամբ, որը հնարավոր է դարձնում զգալու դրանց փիլիսոփայական ուղղվածությունը:
Ցուցահանդեսը բաց կլինի մինչև հուլիսի 15-ը:
Պատրաստեց Հովհաննես ԻՇԽԱՆՅԱՆԸ
