Թուրք ռեժիսոր Էրդեմ Թեփեգյոզի «Մասնիկ» (Zerre) ֆիլմը ռեժիսորի առաջին խաղարկային լիամետրաժ ֆիլմն է: Ռեժիսորը Թուրքիայում առավել հայտնի է իր վավերագրական ֆիլմերով: 2012 թվականին արտադրված ֆիլմը ռեժիսորի երկրում՝ Թուրքիայում, արդեն հասցրել է ստանալ շուրջ 10 մրցանակ, այդ թվում՝ լավագույն ռեժիսոր եւ լավագույն դերասանուհի անվանակարգերում:
«Մասնիկ» ֆիլմը պատմում է Զեյնեփ Սոյնազի մասին, ով ապրում է Ստամբուլի կիսաքանդ թաղամասերի տներից մեկում՝ ծեր մոր ու հաշմանդամություն ունեցող դստեր հետ: Զեյնեփը ծանր աշխատանք է կատարում կարի ֆաբրիկայում, սակայն, շուտով նրան այնտեղից վռնդում են:
Ֆիլմի սյուժեի կենտրոնում են Զեյնեփի սոված մայրն ու հաշմանդամություն ունեցող դուստրը, որոնց միակ հույսը Զեյնեփն է:
Շարժվող տեսախցիկի միջոցով ռեժիսորը հրաշալի նկարագրել է այն միջավայրը, որտեղ գլխավոր հերոսուհին է ապրում՝ խարխուլ թաղամասեր, նեղլիկ, կեղտոտ փողոցներ, աշխատանքից հոգնած եւ անընդհատ աշխատանք փնտրող մարդիկ:
Կարդացեք նաև
Ֆիլմի հեղինակը ցույց է տալիս հերոսուհու կյանքը՝ թույլ չտալով, որ հանդիսատեսը ներխուժի այնտեղ: Ռեժիսորի համար ավելի կարեւոր է ցույց տալ, որ Զեյնեփը միայն մի մասնիկն է այն մարդկային զանգվածի, որ ամեն օր հաց են հայթայթում իրենց ընտանիքները կերակրելու համար:
Իսկ ֆիլմի ավարտը ռեժիսորը դիտավորյալ անորոշ է թողել, որպեսզի թե հերոսուհին, թե հանդիսատեսն ընտրության հնարավորություն ունենան:
Էրդեմ Թեփեգյոզի «Մասնիկ» ֆիլմը ներկայացված է Մոսկվայի 35-րդ միջազգային կինոփառատոնի հիմնական մրցութային ծրագրում:
Աշոտ ԱԹԱՅԱՆ
