Slaq.am կայքի տնօրեն Մենուա Հարությունյանը երեկ իր հասցեին արված «կովի տղա» արտահայտության համար վեճի էր բռնվել «Վճարում ենք 100 դրամ» շարժման ակտիվիստների հետ եւ 12 հոգով ծեծի էին ենթարկել ակտիվիստներին:
Սոցցանցերում այդ միջադեպի հետ կապված քննարկումներում կարծիքներ կան, որ ակտիվիստները քիչ-քիչ վերածվում են սադրիչների, որ որոշ երիտասարդների պահվածքը վարկաբեկում եւ արժեզրկում է ողջ պայքարի իմաստը:
Aravot.am-ի հետ զրույցում քաղաքապետարանի մոտ արդեն 20 օր նստացույց անող Վահագն Մինասյանը վստահեցրեց, որ իրենց պայքարը 1-2 հոգու վարքի հետեւանքով չի կարող վարկաբեկվել. «Բնականաբար, չեմ ողջունում ակտիվիստների նման քայլը, բայց շատ ավելի կոպիտ խախտում է արվել ֆիզիկական ուժի դիմողների կողմից: Հուսով եմ, ոստիկանությունը այս անգամ անգործություն չի ցուցաբերի եւ ըստ օրենքի պատասխանատվության կենթարկի ծեծողներին, պատշաճ ընթացք կտա այս գործին»:
Մեր հարցին՝ ասում են, ակտիվիստներից ոմանք լկտի պահվածք ունեն, ցինիկ են իրենց պահում, համաձա՞յն եք՝ նա պատասխանեց. «Քանի որ շարժումն ապակենտրոն է եղել եւ հանրային, զանգվածային բնույթ է կրել, մենք չենք կարող ամեն մի մասնակցի մուտքը շարժման մեջ սահմանափակել, չթողնել, որ նման վարք ու բարք ունեցող մարդիկ շարժման մեջ մտնեն: Դա ոստիկանության պարտականությունն է՝ ապահովել ցույցերի, երթերի, ակցիաների խաղաղ ընթացքը: Նրանք, ովքեր վիրավորում են այլ քաղաքացիների, պետք է նրանցով զբաղվի ոստիկանությունը եւ համապատասխան օրենքով, սահմանված կարգով ընթացք տա այդ գործերին: Մենք մեր վրա չենք վերցրել ոստիկանության ֆունկցիաները, որպեսզի ամեն մեկին ստուգենք, հետո նոր թույլ տանք շարժման մեջ որեւէ գործողության մասնակցել:
Կարդացեք նաև
Բոլորի համար էլ պարզ է, որ մենք չենք հանդիսանում շարժման կազմակերպիչ: Մենք կարող ենք ընդամենը որոշել նախաձեռնություններ, հանդես գալ առաջարկներով: Մաշտոցի պուրակում առաջարկություններով ենք հանդես եկել, եւ եթե առաջարկների շուրջ հավաքվել է թիմը, հաղթել է նախաձեռնությունը: Մենք չենք կարող վերահսկել հարյուրավոր, հազարավոր անհատների դրսեւորումները, եւ մեզ վրա նման պարտավորվածություն չունենք: Դա ոստիկանության գործն է»:
Հռիփսիմե ՋԵԲԵՋՅԱՆ
