Ադրբեջանը մտադիր է Հարավային Կորեայից գնել մեծ քանակությամբ ժամանակակից զինտեխնիկա: Բայց Սեուլը դեռ չի շտապում կնքել գործարքը` մտավախություն ունենալով, որ Ռուսաստանը կարող է բացասաբար արձագանքել, ինչպես նաև Ադրբեջան-Հայաստան հակամարտությունում կարող է ստեղծել ուժերի անհավասարակշռություն: Գրում է «Ռոսիյսկայա գազետա» պարբերականը` հղում անելով «Հանգուկ Իլբո» կորեական թերթին, որը տեղեկատվությունը ստացել է Կորեայի խորհրդարանի իր աղբյուրներից:
Ըստ թերթի, Ադրբեջանը հետաքրքրվել է կորեական ռազմատեխնիկայով Հարավային Կորեայի խորհրդարանական պատվիրակության Ադրբեջան կատարած այցի ժամանակ:
Ադրբեջանը ցանկանում է Կորեայից գնել երկու սուզանավ, ականակիր նավ, ուղևորափոխադրող նավ, գերձայնային մարզչական T-50 ինքնաթիռներ, 155մմ տրամաչափի ՍԱՈւ Կ-9 սարքավորումներ, ուղղաթիռներ, անօդաչու թռչող սարքեր, կրակի ղեկավարման համակարգեր և այլն: Ասվում է, որ եթե գործարքը կայանա, այն կկազմի 3 միլիարդ դոլարից ոչ պակաս:
«Հանգուկ Իլբո»-ն հայտնել է, որ Կորեայի ԱԳՆ-ին դուր չի գալիս Ադրբեջանին ռազմատեխնիկա վաճառելու միտքը և պաշտպանության նախարարությանը հորդորել է «ցուցաբերել հատուկ զգուշավորություն և զսպվածություն»:
Կարդացեք նաև
Բաքու այցելած խորհրդարանական պատվիրակության անդամ Կիմ Գվան Չժինը հաստատել է, որ Բաքուն հետաքրքրված է Կորեայից ռազմատեխնիկա ձեռք բերելով, բայց ասել է, որ իրենք դեռ պետք է հասկանան` արդյոք արժե ռազմատեխնիկա վաճառել մի պետության, որը տարածքային հակամարտություն ունի մեկ այլ պետության հետ:
Պատրաստեց Հովհաննես ԻՇԽԱՆՅԱՆԸ
Ադրբեջանը շարունակում է նպաստել Հայաստանի ռազմական հզորացմանը` դրտելով նրան նորանոր ու նախորդին գերազանցող համալրումների: Սպառազինության այս մրցավազքը հաստատ խաղաղության ամրապնդմանը չի ծառայում: Վերջը Հայաստանին պիտի մեղադրեն ռազմական գերտերություն լինելու մեջ: