Սեպտեմբերի 17-ից սկսվելու են 2014 թվականի բյուջեի նախնական ցուցանիշների քննարկումները: Այսօր կառավարության հերթական նիստի ժամանակ այս մասին ասաց ֆինանսների փոխնախարար Պավել Սաֆարյանը: Իսկ մտավախություն չկա՞, որ հաջորդ տարվա բյուջեն էլ «կթալանեն» որոշ գերատեսչություններ, ինչպես որ նախորդ տարիներին են արել՝ նիստից հետո փոխնախարարին նման հարց ուղղեցին լրագրողները: Այս առնչությամբ Պավել Սաֆարյանն ասաց.«Էդ հարցերը, մենք 3 ամիս ժամանակ ունենք, դուք կարող եք բազում անգամ տալ էդ հարցերը, հիմի հրատա՞պ ա ձեր հարցը: Ինչ-որ բա՞ն ա սպասվում, կարո՞ղ ա էլ չհանդիպենք իրար: Բյուջեի թալանն ու կազմումը դրանք նույնական բաներ չեն: Թալանի մասին մենք ժամանակ կունենանք քննարկելու, ես ստուգող մարմին չեմ»:
Դիտարկմանը, որ պետական եկամուտների կոմիտեի պետի տեղակալ Վախթանգ Միրումյանն ասել էր, որ պետբյուջեի մասով ֆինանսների նախարարության եւ ՊԵԿ-ի ցուցանիշները չեն համապատասխանում, Պավել Սաֆարյանն ասաց.«Իրենք ասել են, որ իրենց թվերը չեն համապատասխանում: Վարչապետը հանձնարարեց, որպեսզի լրացուցիչ քննարկումներ անցկացվեն: Միգուցե իրենք ավելի օպտիմիստ են, իրենք թվերը չեն ներկայացրել, կներկայացնեն, ձեզ կզեկուցեմ»: Փոխնախարարը նաեւ վստահեցրեց, որ 2014 թվականի բյուջեով նախատեսվում է բարձրացնել աշխատավարձերը:
Նելլի ԲԱԲԱՅԱՆ
