«Վերջին 5 տարիների ընթացքում աճել է հետաքրքրությունը դեպի նորաձեւությունը, թե պատանիները, թե երիտասարդները հետեւում են նորաձեւությանը: Այն ավելի հասանելի է դարձել համացանցի շնորհիվ»,-այսօր լրագրողների հետ հանդիպման ժամանակ նորաձեւության մասին նշեց «Mashroom» բլոգի ղեկավար Մարիաննա Քաբաբյանը:
Նրա խոսքով՝ նորաձեւությունը դարձել է ավելի լայն շերտերին հասանելի, մեր հասարակությունը սկսել է տարբերակել, թե ինչն է նորաձեւ ամբողջ աշխարհում, մարդիկ ստիպված չեն կրել այն, ինչ կա: Շատերը ոգեշնչվում են արտասահմանյան դեմքերից, նրանք այն մարդիկ են, ովքեր նորաձեւության աշխարհից են: Այսօր հայ աստղերը նույնպես ոճի ու նորաձեւության թելադրողներն են: Նրանք նույնպես հետեւում են նորաձեւությանը, դա Սիրուշոն եւ Լիլիթ Հովհաննիսյանն է: Աղջիկները թե սանրվածքը, թե աքսեսուարները կրկնօրինակում եւ մատուցում են իրենց ձեւով.
«Համաշխարհային նորաձեւությունը գնում է մինիմալիզմի կողմով, գույները միատոն, պարզ պետք է լինեն՝ սեւ, կաթնագույն, սպիտակ: Կարելի է օգտագործել խոշոր աքսեսուարներ, իսկ հագուստը չպետք է անհարմար լինի»:
Ինչ վերաբերում է հայաստանյան տղաներին, ապա, ըստ Մարիաննա Քաբաբյանի, նրանք շատ են փոխվել, միատոն, սեւ գույնը կարծես թե վերացել է, տղաները բաց են դարձել գույների նկատմամբ, իհարկե՝ խոսքը ոչ բոլորի մասին է.
Կարդացեք նաև
«Նորաձեւությունը ինքնաարտահայտման միջոց է: Հայ ազգը ընկալում է լավը շատ շուտ: Տխուր է, երբ մարդը միայն նորաձեւությամբ է ապրում, պետք է նորաձեւությունը քեզ ենթարկվի, այլ ոչ թե դու նորաձեւությանը՝ համատարած բրենդամոլությունը տխուր է»:
Անժելա ՇԱՀՈՒՄՅԱՆ
