Դատական նիստին չէին ներկայացել տուժողի իրավահաջորդն ու նրա ներկայացուցիչը:
Լոռու մարզի առաջին ատյանի դատարանում, դատավոր Նարինե Հովակիմյանի նախագահությամբ, շարունակվում է շուրջ մեկ տարի առաջ «Մուշ» ռեստորանում փաստաբան Սամվել Շարբաթյանի սպանության մեջ մեղադրվող Սամվել Դիլոյանի, Արտակ եւ Արեն Վերանյանների դատաքննությունը:
Այսօրվա դատական նիստը հետաձգվեց մինչեւ հոկտեմբերի 22-ը տուժողի իրավահաջորդ Սաթենիկ Սարգսյանի եւ տուժողի իրավահաջորդի ներկայացուցիչ Արթուր Սաքունցի` դատական նիստին չներկայանալու պատճառով:
«Արթուր Սաքունցը դիմումով հայտնել է այն մասին, որ հարգելի պատճառով չի կարող մասնակցել դատական նիստին ինչ-որ միջազգային կազմակերպության հետ հանդիպման է, եւ խնդրել է նիստը հետաձգել, դատական նիստին չի ներկայացել նաեւ տուժողի իրավահաջորդը»,-հայտնեց դատավոր Նարինե Հովակիմյանը:
Կարդացեք նաև
Նիստը հետաձգելու հարցով կողմերի դիրքորոշումները ճշտելուց հետո դատավորը հայտնեց այն հետաձգելու մասին:
Նախորդ դատական նիստի ժամանակ Սամվել Դիլոյանի եւ Արեն Վերանյանի փաստաբան Ռուբեն Հակոբյանը դատարանում բացարկ էր հայտնել մեղադրող դատախազ Աշոտ Գրիգորյանին:
Վերջինս դատարանից ժամանակ էր խնդրել փաստաբանի բացարկին
պատշաճ կերպով պատասխանելու համար:
Անուշ ԲՈՒԼՂԱԴԱՐՅԱՆ
