Վաղը 11-ի Թամանյանի արձանի մոտից մեկնարկելու է երթը մինչեւ կառավարության շենքի մոտ, որի ժամանակ պահանջելու են գենդերային օրենքի փոփոխություն եւ սոցիալական ապահովության փոխնախարարներ Լալա Ղազարյանի ու Ֆիլարետ Բերիկյանի հրաժարականները: Այսօր այդ մասին «Արմատ» ակումբում հայտարարեց «Նախնյաց հետքերով» ՀԿ նախագահ Արման Մխիթարյանը:
Բանախոսը տեղեկացրեց, որ պարբերաբար, հետեւողական երթեր են լինելու եւ «մենք մեր ուզածին կհասնենք վաղ թե ուշ»: «Սա սոցիալական պայքար է, հանուն բարոյականության պայքար է, ոչ թե քաղաքական»,- ասաց Մխիթարյանը` հավելելով, որ արդեն ընդունված «գենդերային» օրենքը միակը չէ, նմանօրինակ նախագծերի մի ողջ փաթեթ կա, որը մեր կառավարությունն ընդունելու պարտավորություն է ստանձնել:
Արման Մխիթարյանն ընդգծեց, որ գենդերային օրենքների յուրահատկությունն այն է, որ դրանց վերնագիրը չի համապատասխանում բովանդակությանը, ինչն էլ պատգամավորներից շատերին թյուրիմացության մեջ էր գցել:
Բանախոսը մանրամասնորեն խոսեց այն արատներից, որոնք այդ օրենքների համատեքստում ներխուժելու են մեր բարքերի մեջ եւ, իր կարծիքով՝ քայքայելու են հայկական ընտանիքի հիմքերը, այդպիսով քայքայելով հասարակությունը: Նա նկատեց, որ «եվրոպական» հորջորջվող այդ «արժեքներն» այսօր խնդիր են նաեւ եվրոպացիների համար եւ տարբեր եվրոպական երկրներում էլ արդեն համառ պայքար է սկսվում նման բարքերի դեմ:
Կարդացեք նաև
Արման Մխիթարյանն ընդգծեց, որ «գենդեր» բառը հանելը, ինչին կառավարությունը գնաց, բնավ էլ չի փոխում օրենքի էությունը, իսկ իրենց պայքարը բառերի դեմ չէ, այլ բովանդակության, ինչը կարող է ուղիղ անդրադառնալ նաեւ մեր կյանքի վրա:
Նելլի ԳՐԻԳՈՐՅԱՆ
