Այսօր «Ֆորում» ակումբում Միացյալ երիտասարդական լիգայի (ՄԵԼ) համանախագահ Սեւակ Հովհաննիսյանը եւ հոգեբան Իրինա Ծատուրյանը խոսեցին հետեւյալ թեմայով՝ ինչ ազդեցություն կարող են թողնել այն աղանդները, որոնք գործունեություն են ծավալում նաեւ դպրոցներում: Սեւակ Հովհաննիսյանը հայտարարեց, որ Պռոշյան համայնքի մի եւ Երեւանի որոշ դպրոցներում ծիլեր է գնցել նոր աղանդ, որի հիմնադիրը նկարիչ Նիկոլայ Ռերիխն է:
Ըստ բանախոսի. «Խոսքը «Մշակութային լիգա» աղանդի մասին է, որը հակաքրիստոնեական է: Պռոշյան գյուղի դպրոցում, Երեւանի դպրոցներում նրանք ունեն մարդկանց որոշակի թիվ: Հայտնի աղանդագետները դա համարում են վտանգավոր պաշտամունքներից մեկը: Вконтакте եւ Facebook սոցիալական ցանցերում այդ խմբերը էջեր ունեն»:
Սեւակ Հովհաննիսյանի ասելով, մարդկանց շփոթության մեջ է գցում Մշակութային լիգա անվանումը, քանի որ մարդիկ կարծում են, որ դա զուտ մշակութային կազմակերպություն է:
Սեւակ Հովհաննիսյանը ասաց, որ կրոնական այդ ուղղության մասին լիգային տեղեկացրել է Պռոշյան գյուղի աշակերտներից մեկի ծնողը:
Կարդացեք նաև
Aravot.am-ը հետաքրքրվեց՝ այցելե՞լ են դեպքի վայր, իրազեկե՞լ են այդ մասին Մայր աթոռին, ԿԳ նախարարությանը: ՄԵԼ համանախագահն ասաց, որ տեղեկացրել են Մայր աթոռին, պատրաստվում են նաեւ ԿԳ նախարարությանը եւս դիմել, իսկ Մշակութային լիգայի ներկայացուցիչների հետ հանդիպումը չի ստացվել:
Հոգեբան Իրինա Ծատուրյանի խոսքով, նման շարժումները ի հայտ են գալիս տարբեր պատճառներով. «Օրինակ, եթե մարդը ունի ներանձնային եւ սոցիալական խնդիրներ, միայնակ է զգում… Բոլորս հիշում ենք, թե ինչպես նրանք սկսեցին գործել Հայաստանում. փողոցներում շրջելով հետեւորդներ էին հավաքում: Իրենք տրամադրում էին հագնելիք եւ ուտելիք, դրա համար էլ մարդիկ էին ներգրավում: Աղանդը մարդկանց զոմբիացնելու միջոց է, այն պետք է մի խումբ մարդկանց, որպեսզի հասնեն իշխանության: Արտերկրում եւ Ռուսաստանում կառուցվել են վերականգնողական կենտրոններ, վաղուց ժամանակն է, որ մեզ մոտ էլ լինեն: Մենք քրիստոնեություն ընդունած ժողովուրդ ենք, իսկ աղանդները մեզ զրկում են մեր արմատներից»: Տիկին Ծատուրյանն ասաց, որ ժամանակին, երբ ինքը ողբերգություն է ունեցել ու միայնակ զգացել, նման մի պաշտամունքային խումբ փորձ է արել իրեն շահագրգռել ու իր կողմը գրավել, բայց ինքը այդս քայլին չի գնացել, քանի որ լավ գիտեր Աստվածաշունչ:
Ինչ վերաբերում է Սեւակ Հովհաննիսյանին, նա այս ասուլիսում կրկնեց նախորդ ասուլիսներում ծեծված տեղեկատվությունը: Aravot.am-ի հարցին՝ ավելի գրագետ չէ՞ր լինի վիդեո, ֆոտոփաստերով ներկայանալ ասուլիսի, Սեւակ Հովհաննիսյանը պատասխանեց, թե փաստերի հավաքման փուլում են: Լրագրողների հարցին՝ ո՞վ է իրեն լիազորել նման հայտարարությւոններ անել եւ այս կամ այն գործչին, շոու բիզնեսի ներկայացուցչին աղանդավորի պիտակ կպցնել ու հետո էլ հերքել, Սեւակ Հովհաննիսյանը պատասխանեց. «Հայ ժողովուրդը»:
Գոհար ՀԱԿՈԲՅԱՆ
