Ամերիկյան S&P Dow Jones Indices գործակալությունը, որը զբաղվում է աշխարհով մեկ արժեթղթերի ինդեքսների հաշվարկներով, հունական արժեթղթերի շուկան հանել է «զարգացածների» ցանկից եւ տեղափոխել «զարգացողների» մեջ: Այս մասին տեղեկանում ենք The Guardian-ից: Այդ որոշման համար երեք պատճառաբանություն է բերվել՝ երկրի ֆինանսական շուկայի հետ մնալը այլ զարգացած երկրների ֆինանսական շուկաներից, այդ շուկայի ծավալի կտրուկ կրճատումը վերջին մի քանի տարիներին, ինչպես նաեւ ներդրողների համար մատչելիության ցածր մակարդակը:
Մի քանի ամիս առաջ Հունաստանի հանդեպ նման դաժան վերաբերմունք էր ցույց տվել ինդեքսների մեկ այլ միջազգային առաջատար հանդիսացող գործակալություն՝ MSCI-ն՝ նշելով, որ Հունաստանի տնտեսության ներկա վիճակը չի համապատասխանում այն չափանիշներին, որոնք դրվում են զարգացած շուկաների առջեւ: MSCI -ն մատնացույց էր արել Հունաստանի բարձր պարտքային ծանրաբեռնվածությունը, տնտեսության ստագացիան եւ կապիտալի ներդրման հետ կապված դժվարությունները:
Հունաստանի արժեթղթերի շուկան վերջին տարիներին մի քանի անգամ պակասել էր ոչ միայն առեւտրի ծավալներով, այլեւ՝ հիմնական արժեթղթերի արժեքով:
2008-ից սկսած՝ Հունաստանի ՀՆԱ-ն կրճատվել է ավելի քան մեկ քառորդով, եւ այդ միտումը կշարունակվի նաեւ ընթացիկ տարում: Եվ միայն եկող տարի է կանխատեսվում փոքր աճ:
Կարդացեք նաև
Հունական տնտեսությունը եւ ֆինանսական սեկտորը ծանր կորուստներ ունեցան տնտեսական ճգնաժամի արդյունքում: Հունաստանի վերցրած պետական պարտավորությունները գործնականում անմարելի են դարձել, ինչի արդյունքում այդ երկիրը դեֆոլտի շեմին էր: Միայն ԵՄ-ի եւ ԱՄՀ-ի հսկայածավալ օգնության շնորհիվ Հունաստանը չկորցրեց ֆինանսապես կարողունակ երկրի կարգավիճակը, թեեւ այսօրվա դրությամբ այդ երկրի պետական պարտքը գերազանցում է երկրի ՀՆԱ-ի 130 տոկոսը:
